Police lakah Chawnpui a par

Mc Dowell's No. 1 Soda Mizoram Premier League-ah nimin tlai khan Chawnpui FC chuan Mizoram Police FC chu 2-1 in an hneh a, semifinal khelh beiseina a nung thar.

Lammuala inkhelah Police tan Lalfakawma'n minute 19-naah Lalramtharmawia ball pet chu khawih kawiin goal hmahruai a khung.

Chawnpuiin second half-ah an lehthal a, man of the match-a thlan Jerry F. Zonunsanga'n minute 48-naah a khalh tlang a, a khung mawi hle. Minute 86-naah Police keeper tihsual vanneih puiin Lalruatfela'n Chawnpui chakna goal a khung.

Nimin tlai inkhel a hmuhnawm a, team pahnihin goal khungna tur chance ṭha an nei ve ve a. Hun tawp hma chiahin Police substitute Lalhlimpuia chuan keeper chiah a hmachhawn hnuah a pet over.

Team game khel thiam tak Chawnpui FC-in hnehna an chan avangin point 11 an hmu a, Chanmari FC nen an point hmh zat a inang.

Mizoram Police erawh palinaah awm chhunzawm zel mah se Chawnpui nen point khat chauhin an inthlau a, semifinal khel turin an dinhmun a him lo hle.