Messi leh Ronaldo tel lohna El Clasico
Pathianni zan dar 8:45-ah Barcelona chuan Real Madrid an mikhual dawn a, 'El Clasico' tia a hminglem an vuah inkhel ngaihvenin football khawvelin Nou Camp lam a hawi ang.
Tun season El Clasico hmasa ber erawhin engti zawng emaw takin lung a ti leng dawn - kum 11 hnua a vawi khat nan Cristiano Ronaldo leh Lionel Messi tel loa khelh a ni dawn.
Nipui transfer laiin Ronaldo-a'n Juventus lam panin Real a chhuahsan a, Italian club-ah a tlangnel leh tawh hle. Messi erawh Sevilla laka 4-2 a an chak ṭuma a inhliam avangin a inlan thei dawn lo.
Team pahnihin tun season-ah beisei an phak lo ve ve a, a bik takin Real Madrid boss Julen Lopetegui dinhmun a him lo lehzual. Spanish coach hian zaninah hnehna a chang lo a nih chuan Real-ah kan hmuh chhunzawm lo a nih pawhin a mak lo ang.
Lungtileng sulhnu
Ronaldo leh Messi tel loa team pahnih intawn hnuhnung ber chu December 2007 daih tawh khan a ni. Hetihlaia Barca coach chu Frank Rijkaard a ni a, Ronaldinho vul lai niin midfield-a Deco leh Xavi inkawp lai a ni.
Bernd Schuster enkawlna hnuaiah Real an la awm a, Robinho, Raul leh Ruud van Nistelrooy te ho an la kawl lai niin Julio Baptista goal khung hmangin 1-0 in an chak.
Ronaldo leh Messi lan hnuah El Clasico hlutna belhchhahin a awm a, club ropui zawk nih inchuhna inkhel chu khawvela player ṭha ber nih inchuhna inkhel a ni tel nghal a, El Clasico khelh a nih chuan Madrid leh Barcelona khawpui a reh
ṭhuap ṭhin.
Pathianni zanah erawh player ropui pahnih tel loin an intawng dawn a, a ropuina erawh a nep phah ring suh.
The 'Julen' Final
Sawi nawn a ngai leh ṭhin - Real-in beisei angin season an hmang lo a, coach Julen Lopetegui chu El Clasico-a chak loh hlau ber a ni hial ang! Spain coach hlui hi Barcelona hmachhawn hman loa ban tur ang hialin Spanish media-te chuan an tarlang hman!
Mahse, Spanish coach hian Barca a hmachhawn ngei dawn niin a lang ta - Pathianni zan inkhelin a hma hun thui takin a hril dawn tih a chiang a, hnehna chan ngei a duh ang.
Real hi an league match hnuhnung pali-ah vawi thum an tlawm a, vawi khat an khingpui an inhnehtawkpui. La Liga table lamah pasarihna dinhmun an luah mek a, an hmelma kumhlun Barca erawh hmahruaitu an ni.
Barcelona manager Ernesto Valverde-a'n tun hnai result vangin Real a dah hniam duh lo a, "Madrid hi tun hnai result avangin an hlauhawm thei hial zawk ang. Team ṭha tak an ni tih hi kan lakah pholan an duh dawn a ni," a ti.
Ronaldo vang maw?
Real attacking midfielder Isco chuan, "Kan hnena khelh duh lo ngaiin kan ṭap thiang lo," tiin Ronaldo chungchang a sawi a, mahse Madrid club hi Portuguese forward tel loin an buai tih chu phat rual a ni si lo.
European champion hian season riat chhung season tina goal 40 aia tlem lo khung ziah player an chan a, a hmun ruak luah tur player an lalut leh si lo hi an buaina niin a lang - an league match hnuhnung pali-ah goal khat chiah an khung a, a khungtu lah left back Marcelo a ni!
Karim Benzema-a'n thla hnih dawn goal a khung loh hnuah Viktoria lakah a khung a, 2-1 in an chak. Goal khat dang hi Marcelo khung bawk a ni a, a lawmawm lo lai ber erawh Ronaldo awm se Viktoria hi 'intihhlim' nana goal a khung ṭeuh theihna team 'tiat' lek an ni.
Ronaldo-a'n Barcelona a hmachhawn vawi 30-ah goal 18 khungin assist vawi khat a nei a, kum 2012 phei kha chuan El Clasico match rukah a zawnin goal a khung vek - Pathianni zanah an chak zo lo a nih chuan an lunglen a zual ang.
Messi tel lohna
Barcelona-in El Clasico-a Messi an chhawr thei lo tur hi an ui khawp ang. Real-a hmachhawn tawh vawi 38-ah goal 26 a khung a, assist vawi 13 a nei thei!
Messi a inhliam rual khan Barca boss Ernesto Valverde chuan, "Engtinnge a hmun ruak kan hnawhkhah ang ka hre lo," a ti a, Jordi Alba chuan, "Messi thlak zo tur an awm lo ang," a ti bawk.
El Clasico-a Messi hmun ruak luah thei ber tura ngaih chu pound maktaduai 135.5 man Ousmane Dembele a ni. Mahse, kum 21 mi forward hi a 'consistent' tawk lo chu sawisel a hlawhna a ni.
Barca-in duhthlan tur an ngah tih erawh hriat tel a ṭha. Pound maktaduai 30 chuang man Malcom leh striker ṭhangduang Munir El Haddadi te an la kawl cheu a, formation thlaka midfield lam an 'uar' duh a nih pawhin Arturo Vidal, Rafinha leh Sergi Roberto te an la nei.
Zanin Inkhel Tur
Girona 4:30 PM Rayo Vallecano
Athletic Club 7:45 PM Valencia
Celta de Vigo 10:00 PM Eibar
Levante 10:00 PM Leganés
Atlético Madrid 12:15 AM Real Sociedad
October 28, Pathianni
Getafe 4:30 PM Real Betis
Barcelona 8:45 PM Real Madrid
Deportivo Alavés 11:00 PM Villarreal
Sevilla 1:15 AM Huesca
Team Dinhmun
# Team Pld W D L GF GA GD Pts
1 Barcelona 9 5 3 1 23 11 12 18
2 Espanyol 9 5 2 2 13 7 6 17
3 Deportivo Alavés 9 5 2 2 12 8 4 17
4 Sevilla 9 5 1 3 20 12 8 16
5 Atlético Madrid 9 4 4 1 10 5 5 16
6 Real Valladolid 9 4 3 2 8 6 2 15
7 Real Madrid 9 4 2 3 13 9 4 14
8 Levante 9 4 1 4 14 15 -1 13
9 Real Sociedad 9 3 3 3 12 11 1 12
10 Getafe 9 3 3 3 8 8 0 12
11 Real Betis 9 3 3 3 5 7 -2 12
12 Eibar 9 3 2 4 10 13 -3 11
13 Celta de Vigo 9 2 4 3 13 13 0 10
14 Valencia 9 1 7 1 7 8 -1 10
15 Girona 9 2 4 3 10 13 -3 10
16 Villarreal 9 2 3 4 7 8 -1 9
17 Athletic Club 9 1 6 2 11 15 -4 9
18 Leganés 9 2 2 5 8 13 -5 8
19 Rayo Vallecano 9 1 3 5 9 18 -9 6
20 Huesca 9 1 2 6 7 20 -13 5