Paris St-Germain an kal fawr

French Ligue 1 khelh laiah Paris St-Germain chu fal takin an kal fawr zel. Thawhlehni zan inkhelah PSG hian Nantes chu 2-1 a luhchhuahin an mahni hnaih bertu Marseille lakah point 15 ngawtin an sang fal.

La Beaujoire-a inkhelah PSG tan hian Mauro Icardi leh Thilo Kehrer ten goal khat ve ve an khung, mualneitu lamin goal hnih an phurh hnuah Moses Simon chuan goal khat khung ve mah se awmzia a nei thui tawh lo.

Inkhelh hmain PSG hian boruak neuh neuh an ngah, forward Neymar-a'n a piancham a lawm danah coach Thomas Tuchel a lawm lo a, Brazil international hian hliam a neih avangin Nantes hi a hmachhawn thei lo zui bawk.

Rawlthar duhawm Kylian Mbappe pawh Montpellier nen an inkhelh ṭuma thlak a nih avangin a lungawi lo hle. Mahse, Nantes lakah erawh France international forward hi minute 90 chhung khelhtir a ni a, goal erawh a khung lo.

Player ṭha Neymar inlan thei lo mah se PSG hian Angel Di Maria an neih avangin buaina tur a awm lo. Argentina international hian Icardi goal khung tur a siamsak a, chumi hnuah a corner pet chu German defender Kehrer-a'n an goal hnih nan a tauh lut bawk.

German manager Tuchel-a enkawl PSG hian February 9, Pathianni zanah parukna ni lai Lyon an hmachhawn leh ang. French Cup leh Champions League khelh hmabak an neih bawk avangin player siksawi dan thiam a pawimawh ang.