An tlantu Klopp zarah ropuiin Liverpool an lang

Jurgen Klopp-a'n Liverpool a enkawl hnuah FA Cup chiah nomawi chawi loh a nei ta - Pathianni zan khan League Cup final-ah Liverpool chuan Chelsea chu penalty hmangin an hneh a, Klopp leh a nauten Carabao Cup nomawi an chawi.

Wembley Stadium-ah minute 120 chhungin goal a lut lo a, he goal luh lohna inkhel hi 'final hmuhnawm ber pawl' tiin sawi ta ila, inkhel en lo tan chuan awih a harsa mai thei - mahse, inkhel entute chuan a hmuhnawmzia an sawi bang thei lo.

Team pahnihin goal an khung theih loh avangin penalty hmangin chak zawk zawn a ni a, penalty-ah pawh inhnehtawk tak an ni. Player 10 ve vein an pet goal hnuah goalkeeper pahnihin an pet ve ve a ṭul.

Chelsea-in penalty pet dawnah chhandamtu a nih beiseiin Kepa Arrizabalaga an luhtir a, mahse, Spanish keeper hian a penalty hmachhawn a chhuah vek bakah a pet goal lo a, Reds keeper tuaitir Caoimhin Kelleher-a'n a pet goal bawk si avangin Liverpool hi 11-10 in an chak - a vawi kua nan Reds an champion a, record thar an siam.

Sorry Matip
Liverpool-in inkhel ṭantir aṭangin Chelsea an nawr nghal a, tlarhmaah Mohamed Salah, Sadio Mane leh Luis Diaz te inkawp chu Chelsea tlarhnung tan mang ti ang khawpin an hnawksak a, Salah-a'n a khung tawh ngei tura ngaih, keeper a pet khum hnua Thiago Silva-a'n a lo petchhuah hmante chu uiawm tak a ni.

Mahse, Reds tana goal khung hmasa ber erawh defender Joel Matip a ni a, star player tam tak karah a phu anga fak hlawh tawk lo defender hian ṭha zetin a tauh lut - Wembley Stadium a nghing a, mahse, Kop ho hlim chhung a rei lo.

Video assistant referee hmangin Stuart Attwell-a'n a ennawn a, Mane-a'n freekick aṭanga ball kal Matip tana a tauh thlak hmain Virgil van Dijk chuan Mane um tumtu Reece James a lo dang a, Dutch defender hi a offside avangin a pawm lo - stadium a reh zui.

VVD chuan, "Kha thutlukna kha referee hnenah ka hriatthiam loh thu ka sawi. Ball kha an rawn vawrh kang a, khawih thei dinhmunah ka ding lo hrim hrim. James kha ka dang a, mahse, player inven chu phal a ni lawm ni?" a ti a, goal khungna kawnga a inrawlh vea an ngaih avanga offside an ham chu a hrethiam lo.

Offside khawmpui
Matip-a goal khung pawm loh vangin Reds an lawm lo a, Chelsea an lawm bik lo - vawi thum ngawt chu offside vangin an goal khung pawm a ni lo a, Lukaku goal khung pawm loh chu a uiawm lehzual.

Bench aṭanga luhtir striker hian Trevor Chalobah siamsak chu ṭha zeta insiamrem chungin goal-ah a chantir a, striker class sang goal a ni. Mahse, linesman-in offside a phar a, VAR hmangin he thutlukna hi nemngheh zui a ni.

Lukaku offside chhan hi a ban vang a ni - kut hmanga goal khung theih a nih loh avangin 'kut' offside thei lo mah se ball-in ban chung lam a fuhin handball a ni lo a, Lukaku hi a ban a lo phar chhuah nasat deuh hlek avangin referee hian offside tiin thutlukna a siam.

Chelsea an vanduai - Kai Havertz goal khung pahnih chu offside vanga pawm a ni lo bawk a, Matip goal nen chuan League Cup final-ah offside vanga pawm loh goal li a awm tihna a ni!

Fak tlak Mendy
Chelsea tan keeper Edouard Mendy a khel ṭha takzet - Naby Keita leh Sadio Mane khung ngei tura ngaih a dan phei chu pui tak a ni. Senegalese keeper hian Keita shot ṭha tak chu ṭha takin a dang a, a per lehlam Mane khung ngei tura ngaih hnai set sawt aṭanga a dan pawh keeper ṭha bik lo tan chuan dan chi a ni lo.

Tuchel-a'n penalty an pet dawn tih a hriatin Mendy a la chhuak a, khawvela keeper man to ber Kepa a luhtir. August thla khan UEFA Super Cup final-a Villarreal an hmachhawn ṭumin Tuchel hian hetiang bawk hian thutlukna a lo siam tawh a, a tifuh.

Mahse, League Cup-ah erawh thawnthu a danglam ta a, Kepa-a'n penalty dan a nei lo a, a hlah tel bawk avangin man nei lo, academy chhuak Kelleher chu a tawpah a team chhandamtu a ni ta zawk.

Chelsea fans tam takin Mason Mount an 'star' rih lo khawp ang - English midfielder hian chance duhawm vawi hnih a hlah a, a vawi hnihnaah phei chuan tibuaitu nei loa Kelleher chiah a hmachhawn chungin post a tih per!

Thlante chu tam tak...
EFL Cup final khelh a nih hmain Team of the tournament puan a ni tawh a, final lut Liverpool player pakhatmah an awm lo - an champion zui avangin champion team aṭangin team of the tournament-a lang phak an awm lo tihna a ni.

Mahse, a awm lo hran lo. Klopp-a'n final an khelh hmain player 29 ngawt League Cup-ah a chhawr hman a, keeper pathum Alisson Becker, Kelleher leh Adrian ten tun inelna hi an khel vek!

Final-ah pawh Klopp-a'n Kelleher chungah rinna a nghat tlat a, kum 23 mi second choice keeper hian a pu rinna a tithlawn lo - Liverpool high pressing game-ah a ṭangkai a, a tih tur a hria a, Chelsea tlarhma a dang chat hneh hle.

Irish keeper hian Christian Pulisic leh Romelu Lukaku khung ngei tur nia lang pahnih chu ṭha takin a dang ve ve a, Reds tan Alisson awm loh lai pawhin manganna tur a awm dawn lo tihna a ni.

Professional football-ah meuh pawh khawngaihnain hmun a chang ve tur a ni. Caoimhin Kelleher hi player naupang tak, inelna hrang hranga inlan a ni a, engtinnge ka tih chuan ang? Keimahah hian mi pahnih an awm a, pakhat chu football manager a ni a, pakhat chu mihring pakhat ve mai a ni thung - zaninah chuan ka mihrinnain hnehna a chang a, Kelleher kha a khel a ni.

Kan training centre-ah chuan he club tana nomawi lo chawi tawh goalkeeper-te hming chuanna a awm a, Kelleher hming pawh kan tarlang ve thei ang chu - chu chu thil nih dan tur reng pawh niin ka hria.
Kelleher hi khawvela number two ṭha ber a ni. A khel ṭha takzet. Number two nih chuan mamawh apianga inpeih at a ngai a, zaninah kha chuan a khel ṭha hle a ni. Vawi hnih tal chu save ropui tak a nei a, kan thlang kha kan tisual lo tih min hmuhtir a, shootout-ah khan a theihna zawng zawng kan hmu bawk.

Fan-ten lawmna tur an neih avangin ka lawmpui a, Chelsea kha team ṭha tak an ni a, kan inbuk tawk viauin ka hria. Mi mawl kan ni lo a, zaninah pawh khan vanneihna kan mamawh tih kan hria.
Theihtawp chhuah a, nun khawchhuah tuma kan beih reng a ngai a, Nilaini zanah (Vs Norwich City; FA Cup) match kan nei zui a, awih a harsa zawk hial. Mahse, zanin kan result hian Anfield a chawi nung ang tih ka ring tlat a, mipui hmuhnawm tih tur kan phochhuah theih ka beisei. - Jurgen Klopp, Liverpool manager

Football hi a chang chuan a hmuhnawm em em ṭhin a, zaninah pawh khan a hmuhnawm takzet a, inchhirna leh lawm lohna tur a awm lo. Kan theihna zawng zawng kan hlan a, football hmuhnawm tak a ni. Romelu goal khung pawm loh kha chu huaisen thlak ve tak niin ka hria - khatiang ang goal khung pawm loh avang khan lungawi lohna chu kan nei ve bawk e.

Vanneihna kan mamawh - vawi thum goal kan khung a, chance ṭha tak tak kan nei a, chak zawk awm loa hun pangngai khar kha result awm reng a ni. Team pahnih kha chak zawk thei ve ve kan ni. Kepa chungchangah chuan khatiang chiah khan a hma pawhin thutlukna ka lo siam tawh a, penalty-ah hian Mendy aia a ṭhat hret avangin kha thutlukna kha siam ka ni. Player 11-in penalty pet vek ngai hi chu thil thleng zen zen a ni lo a, Kepa kha a hmanhmawh hret bawk a ni.

Huaisen taka thutlukna siam hun a awm a, thutlukna chu tuar dawn mah ila, mi sawiselna ngaihthlak phawta siam ai chuan a fuh zawk. Kha inkhel quality sanzia kha kan pawm a ṭul a, Liverpool kha Europe-a goal nawr kawnga team ṭha ber an ni hial mai thei. Chutiang ngaihtuah chuan, khatianga kan dang chat reng thei leh khatiang taka kan khel reng thei kha ka lawm hle a ni. - Thomas Tuchel, Chelsea boss