Barca tan Auba a vul zel

Arsenal duh loh Pierre-Emerick Aubameyang-a'n danglamna thlen turin a la ṭha tawk tih a pholang zel a, Catalan club tana a match hnuhnung pathuma a goal ngana chu Pathianni zan khan a khung leh ta.

Barcelona hian an mikhual Athletic Bilbao chu 4-0 in an sawp a, Auba hian defender Gerard Pique-a ball tauh, crossbar per, per lehlam chu a lo khung a, minute 37-naah Barca hi hma a hruaipui.

Catalan club tana danglamna thlentu ber erawh Ousmane Dembele a ni a, French forward hi minute 67-naah luhtir niin, goal thum a thawk chhuak hman - minute 73-naah goal a rawn khung a, hun tawp hnaih lama substitute Luuk de Jong leh Memphis Depay khung tur a siamsak bawk.

Aubameyang-a'n February-ah Barcelona zawm chauh mah se tun season-ah Catalan club tana goal khung tam pathumna (5 goals) a ni nghal der a, Depay (9) leh Luuk de Jong (6) chiah a tluk lo.

Barcelona-in league match nga chhung chu a zawnin tlawm an nei ta lo a, vawi khat draw-in, vawi li an chak - table-ah palina an ni leh ta a, Champions League khelh beiseina a sang zel.

Atletico Madrid leh Barcelona lawmna turin an elpui Real Betis an tlawm a, Sevilla chuan 2-1 in an hneh. Champion beiseitu Sevilla tan Ivan Rakitic (penalty) leh Munir El Haddadi ten goal khat ve ve an khung a, Betis tana Sergio Canales-a freekick khung a tlai hret.