Conte leh Spurs nomawi beiseina FA Cup

Tottenham Hotspur-in kum 2008-a League Cup nomawi an chawi hnuah eng inelnaah mah an la champion leh lo. London club-in champion duhin manager an thlak kual a, nomawi specialist Jose Mourinho meuh pawh a hlawhcham. Spurs hian tun season-ah nomawi an chawi dawn a nih chuan FA Cup chiah beisei tur an nei tawh.

Antonio Conte hote hian zanin dar 1:25 hian FA Cup fifth round-ah Manchester United pet chhuaktu Middlesbrough an hmachhawn dawn. Boro hi Championship club ni mah se Old Trafford-ah hnehna hlado an chham thei a, Championship-ah pawh team vantlang chunglam niin pariatnaah an awm mek.

Nomawi chawi thiam
Mourinho ang thoin Conte hi nomawi chawi thiam a ni a, Italian manager hian a kalna apiangah nomawi a chawi zel. Spurs hian striker ṭha Harry Kane bakah Son Heung-min leh Dejan Kulusevski te an kawl.

London club hian Premier League champion Manchester City che ṭha tluang lai titawpin Etihad Stadium-ah an hneh thei a, an match hnuhnung berah Leeds United an sawp. Conte hian champion pui thei tur squad a nei tih chu a chiang a, chutihrualin rinkai ber erawh an ni lo.

Man City hnehtu Spurs hian relegation zone-a awm Burnley an hneh leh chuang lo a, an khelh ṭhat ni leh chhiat ni a inthlau ve hle. Boro lakah pawh Spurs hi vanduai thei an ni a, an khelhna tur hi Riverside Stadium a nih avangin hnehna chan a awlsam lo ang.

City inlan dawn
Manchester City-in Arab sum mawm an chawm hnuah nomawi ṭhahnem tak an chawi tawh a, FA Cup erawh vawi hnih chiah an la chawi. Pep Guardiola hote hi stage sangah an chesual leh ṭhin a, season liam ta khan semifinal-ah Chelsea an hneh lo.

Zanina an khelh tur erawh fifth round chauh a la ni a, team 16 lai la dam zingah Man City hi tum châkawm ber zinga mi Peterborough United nen pawhfuh an ni a, quarterfinal an luh ngei a rinawm.

Peterborough hian February 20 khan Sir Alex Ferguson-a fapa Darren Ferguson chu result an neih ṭhat loh avangin an han a, manager thar Grant McCann hnuaiah hma an sawn chuang lo. Posh hian match hnuhnung pahnihah Fulham leh Hull City an hneh lo a, an mual ABAX Stadium-a khelh tur ni mah se Man City hneh tur chuan vanneihna an mamawh ang.

FA Cup - Fifth Round
Zanin Inkhel Tur
Peterborough United 12:45 AM Manchester City
Crystal Palace 01:00 AM Stoke City
Middlesbrough 01:25 AM Tottenham Hotspur
March 2, Nilaini zan
Luton Town 12:45 AM Chelsea
Southampton 01:00 AM West Ham United
Liverpool 01:45 AM Norwich City
March 3, Ningani zan
Everton 01:45 AM Boreham Wood
March 7, Thawhṭanni zan
Nottingham Forest 01:00 AM Huddersfield Town