Khawdurin Mizoram a chhan

Mizoramin an match hmasa bera Bihar an chelh hnuah Manipur an chelh leh a, cricket inelnaa tawnhriat la nei tlem Mizo tlangvalten kumin Ranji Trophy-ah result duhawm an hlawh chhuak. Chutihrualin Mizoram hian point khat hlawh chhuak turin vanneihna an mamawh a, Manipur nen an inhnehtawk theih nan hian khawdur vanga over sarih an khelh zawh theih loh chu a pawimawh hle.

Jadavpur University Campus-ah February 24-27, 2022 chhung khan Ranji Trophy match hnihna hi khelh a ni a, Mizoramin vawm hmasak an thlang. First innings-ah Nitesh Sedai-a'n 95 runs a siam zarah Manipur-in 197 runs an siam. Mizoram tan chak beiseina a awm a, amaherawhchu Mizo tlangvalte an che ṭha lo.

Iqbal Abdulla (41), Taruwar Kohli (22) leh Uday Kaul (16) te zarah Mizoram an mualpho lo a, B. Lalnunfela'n thi loin 11 runs a siam bawk. Mizoram hian 127 runs chauh an siam avangin chak beiseina a thamral a, an beisei san theih ber chu draw-ah a ngaih theih.

Manipur-in second innings-ah 425 runs tehmeuh an siam a, wicket kua an hloh tihin an duhtawk. Al Bashid Muhammed chuan 150 runs tehmeuh a siam a, point nga hmu thei dinhmuna ding Manipur an fimkhur avangin an duhtawk har hret.

Mizoram top order Vikash Kumar (26), Lalhruaizela (11) leh Remruatdika (12) te an che chhe lo a, captain Taruwar Kohli-a'n 69 runs a siam bakah Iqbal Abdulla-a'n 81 runs a siam. Player thawh hlawk ber erawh Uday Kaul a ni a, thi loin 88 runs a siam.

Manipur bowler-ten wicket riat an la hman a, chak turin wicket hnih dang an la mamawh. Mizoram dinhmun hi ṭha lo hman viau mah se khua a thim hman avangin over sarih vawm zawh hman a ni lo a, team pahnih an inhnehtawk. Manipur-in first innings-ah run an siam tam zawk avangin point thum an hlawh chhuak a, Mizoram pawhin state pawn player-te puihnain point khat an hmu ve bawk.

March 3-6, 2022 chhung hian Mizoramin Eden Gardens, Kolkata-ah Nagaland an hmachhawn dawn a, Plate Group aṭanin team pakhat chiah an tlang dawn avangin Mizoram tan beisei tur a awm tawh lo. Nagaland erawh point 13 hmu tawhin hmahruaitu an ni a, group stage paltlang turin Mizoram lakah chiang taka chak an tum dawn a ni.