Leeds manager tur Marsch

Leeds United-in result ṭha an neih loh avangin manager Marcelo Bielsa an ban a, a thlakna tur nia an sawi chu Jesse Marsch a ni. Khawthlang media-te chuan RB Leipzig manager hlui Marsch leh English club hian inremna an ziak fel tawh niin an sawi.

Kum 66 mi Bielsa hian June 2018 khan Whites hi a zawm a, season hnihnaah Championship-ah champion puiin Premier League-ah a kaipui. Pa danglam tak Bielsa hian attacking football a khelhtir ṭhin avangin ngainat a hlawh a, tun hnai league match thumah vawi thumah chiang taka an chak loh vek avangin ban hi a tawk ta a ni.

Club chairman Andrea Radrizzani chuan, "Premier League khel zel turin inthlak danglam kan mamawh," tiin a sawi. Kum 48 mi Marsch hian hlawhtling takin New York Red Bulls leh Red Bull Salzburg te a enkawl tawh a, Leipzig-ah erawh season khat a daih lo thung.

Marsch hian UEFA Pro Licence hi Scotland aṭangin a nei a, Celtic nen pawh tun hmain sawi zawm an lo ni tawh. American manager hian league lianah tawnhriat a la ngah tawk lo a, tla thei dinhmuna ding Leeds United chhanhim chu a hna hmasa tur a ni ang.