Champions League khelh tum zingah West Ham

1st March, 2022

West Ham United chuan Pathianni zan khan Wolverhampton Wanderers chu 1-0 in an hneh a, London club tan season thara Champions League khelh beiseina a nung thar. David Moyes-a hote hi panganaah awmin point 45 an hmu a, an chung chiaha awm Manchester United aiin point hnih chauhin an hmu tlem zawk.

Hammers hian March 2, Nilaini zan hian FA Cup fifth round-ah Southampton an hmachhawn dawn a, Premier League-ah champion thei dinhmuna ding Liverpool nen March 5, Inrinni hian an inkhel lehnghal ang.

Piancham lawmna
London Stadium-a inkhelah Hammers an khel ṭha a, goal chance an insiam hnem zawk. Tlarhmaah Michail Antonio khel ṭha viau mah se goal hmaah a ke a hmui tawk lo. Hammers captain Declan Rice pawhin goal ban a pet per bawk.

Wolves hian first half tawp hma hretin chance an nei a, hun ṭha an bawhpelh ve tho avangin first half-ah goal a lut lo. Second half-ah erawh Hammers-in goal an khung a, Antonio siamsak chu Soucek-a'n a khung.

Czech Republic international Soucek-a'n kum 27 piancham pha lawm nan goal a khung a, a goal erawh a pu tan a hlan. Soucek chuan, "Fan-te tana piancham lawmna ka pek ṭhat theih ber chu goal kha a ni ngei ang. Ka pu pawhin a hmunah ngei ka inkhel a vawi khat nan a rawn. Kum 80 a ni mai dawn a, ka naupan lai aṭanga min thlawptu tan ka goal khung hi ka hlan," tiin a sawi.

Yarmolenko tan
West Ham-in Ukraine international Andriy Yarmolenko chu an ram buaina avangin chawlh an pe a, Wolves an hmachhawn ṭum hian an thlawpzia an lantir. Hammers player-ten warm up-naah Yarmolenko hming leh number 7 chuanna kawr an ha vek a, 'Andriy Yarmolenko, nang leh Ukraine mipui tan kan ṭawngṭai reng e,' tih banner chu an tar chhuak. Inkhelh hmain Hammers captain Declan Rice-a'n Yarmolenko hming chuanna jersey a pawtparh bawk

England international midfielder Declan Rice chuan, "Russia-in Ukraine a run ṭan khan training-naah Yarmo hi ka hmu a, hrehawm a ti takzet. Chuvangin amah leh Ukraine mipuite hnungah kan ding tlat," tiin an ṭhianpa Yarmolenko leh an ram Ukraine an thlawp tlat thu an sawi.