India tan Shreyas Iyer a vul

India chuan Pathianni zan khan Sri Lanka wicket rukin an sawp a, T20 match thum an khelhah 3-0 in series an la. Men in Blue tan Shreyas Iyer-a'n thi loin 73 runs a siam a, player of the match bakah player of the series-ah thlan a ni.

Dharamshala, Hima-chal Pradesh-a inkhelah Sri Lanka-in bat hmasak an thlang a, captain Dasun Shanaka-a'n an mualpho lutuk tur a hliah khuh. Lions top order-ten run tam an siam lo a, captain Shanaka hian thi loin 74 runs rawn siamin over 20-ah 146/5 runs an siam.

India tan target harsa a ni lo a, Shryeas Iyer-a'n 73 runs rawn siamin over 16.5 lekah 148/4 runs siamin target an umpha. Iyer hian match hmasa berah thi loin 57 runs a siam a, match hnihnaah pawh thi loin 74 runs siamin match thum series-ah vawi khatmah a thi lo.

Men in Blue leh Sri Lanka hian Test match vawi hnih an khel leh dawn a, match hmasa zawk hi March 4-8, 2022 chhung hian Punjab Cricket Association Stadium, Mohali-ah an khel ang.