Tun season chu a harsa - James

LeBron James chuan NBA regular season kal lai chu an tan a harsat thu a sawi. James khelhna Los Angeles Lakers hi nimin zing khan New Orleans Pelicans lakah 123-95 in an chak lo, an match hnuhnung pariatah vawi ruk teh meuh an tlawm.

Pelicans an ṭangrual ṭha, point 22 neitu CJ McCollum a langsar, chutih rualin player dang paruk ngawtin point 10 chuang an neih theih avangin an thawhhona a ṭha tih a chiang - Lakers tan tu ber nge ven tur a hriat theih loh ang.

Kum 37 mi James chuan, "Chak dan kan zir a ngai, a nih loh chuan dinhmun hniam takah kan awm thei. A bul ṭan nan chuan match kan khelh leh hmasak ber tur ni se a ṭha ang," tiin a rang thei ang bera insiamṭhat an mamawh thu a sawi.

NBA champion vawi li ni tawh James chuan sawi zawmin, "Keimah chauh ka ni lo, team pumpui tan season harsa a ni," a ti a, season tawpah a chhuak dawn em, tih zawhna erawh a chhang duh lo.

Nimin zing inkhel dangah James Harden a che ṭha chhunzawm. Harden hian Philadelphia 76ers tan point 29 leh assist 16 a neih bakah rebound vawi 10 a la bawk a, triple-double neiin New York Knicks lakah 125-109 in hnehna an chang.

Lakers ang bawkin Golden State Warriors an chak lo. GSW hi Dallas Mavericks lakah 107-101 in an tlawm. Mavericks chak theih nan Luka Doncic chuan point 34 a nei. Inkhel dangah Detroit Pistons chuan Charlotte Hornets an hneh bawk.

NBA - Nimin Results
Detroit Pistons 127 - 126 Charlotte Hornets
Los Angeles Clippers 99 - 98 Houston Rockets
Dallas Mavericks 107 - 101 Golden State Warriors
Denver Nuggets 124 - 92 Portland Trail Blazers
New Orleans Pelicans 123 - 95 Los Angeles Lakers