Augsburg lakah Dortmund-in point an hloh

Pathianni zan khan Borussia Dortmund-in Augsburg hmachhawn turin WWK Arena-ah an lenglut a, 1-1 in an inhnehtawk. Marco Rose hoten point hnih an hloh avangin match 24 khelh zawhah hmahruaitu Bayern Munich chu point riat tehmeuhin an pha lo.

Augsburg-in chance ṭha a nei hmasa a, goal khung hmasa zawk erawh Dortmund a ni. Thorgan Hazard-a'n minute 35-naah mawi zetin vei lam aṭangin a lalut a, player pahnih a bum hnuah ṭha zetin goal hmahruai a khung.

Second half-ah Dortmund forward Donyell Malen-a'n crossbar a pet per a, mikhual team-in hnehna an chang mai dawn niin a lang hman. Amaherawhchu Augsburg an beidawng lo a, minute 78-naah Noah Sarenren Bazee-a'n siphurh sutna goal a tauh lut.

Dortmund hian an striker chhuanvawr Erling Haaland an la chhawr thei lo a, Norwegian forward tel loin Champions League leh Europa League aṭangin an tla tawh. Bundesliga lamah pawh Haaland awm loh chhungin Bayern nena an inkar a zau ta hle.