Aizawl FC-in Lajong an hneh lo

MPL club Aizawl FC chuan nimin tlai khan tun season-a an I League match hmasa berah Shillong Lajong 2-1 in an hneh lo. Hmarchhak aṭanga I League club hmasa ber Lajong hian kumin hian kalphung thlakin foreigner an la lo a, Indian player hlang leh kum naupang zawk player an chhawr avangin Mizo club tan point hlawhchhuah zawh loh hi mualphona a ni.

I League inkhel dangah nimin khan champion lai Minerva Punjab pawh Tau Devi Stadium-ah mualneitu Churchill Brothers nen goal awm loin an inhnehtawk bawk.

Team inang lo
Shillong Lajong-in foreigner an nei lo a ni ringawt lo a, an player neihte pawh anmahni aṭanga inzir chhuak a ni a, sum tam tham senga lakluh an awm lo. Mizo tlangval Samuel Lalmuanpuia chu rinrawl a ni a, Zemabawk North forward hian captain armband a hreng a, Mizo pahnih dang F. Lalrohlua leh Lalawmpuia Hnamte ten inkhel bul an ṭan bawk.

Aizawl FC erawh an foreigner panga zinga pali Alfred Kemah Jaryan, Kareem Omolaja, Leonce Dodoz leh Ansumana Kromah ten bul ṭanin state pawn player Gurpreet Singh a inlan bawk a, Mizo parukin inkhel bul an ṭan.

Lajong an rang
Shillong Lajong-in an mual an bel tih a lang a, an ball pass ṭha tak leh an chet ranna avangin tawnhriat ngah zawk Aizawl FC lakah an chungnung a, Mizo club dinhmun a derthawng tih a lang nghal.

Amaherawhchu, Aizawl FC tana a khelh hmasak bera goal khungtu Kromah hmangin Mizo club-in chance ṭha zet an nei a, Liberian forward hian a khung thei lo.

Minute 20-naah mualneitu tan Naorem Mahesh Singh-a'n box sir aṭangin mawi zetin a ṭhuai lut a, keeper Gurpreet dem theih a ni lo. Aizawl FC-in hun rei lote inkhel thunun zawk nei mah se Lajong-in hun chanve lama hmahruai an phu zawk.

A la ngai reng
Second half-ah Aizawl FC an danglam tam lo a, Shillong Lajong player-ten ball an la inpe ngam. Mahse AFC-in chance nei hmasain Alfred-a'n goal khung ngeina tur chance chu keeper zawnah a pet. Minute 51-naah Pradhan-a cross ball dik zet chu Mahesh-a'n a goal hnih khung nana hmang a, goal hmaah Lajong an hriam zawk avangin Aizawl FC-in dinhmun a ṭha lo takzet.

Hemi hnu hian Lajong captain Samuel-a'n AFC defender Hmingthanmawia lakah penalty beisei mah se pek a ni lo a, Mizo club-in beisei tur an la neih phah a. Minute 70-naah Kromah-a'n a penalty hlawhchhuah chu goal-ah a chantir a, inkhel a nung thar.

Mizo club-in siphurh sut nan minute 20 dang an nei a, amaherawhchu MPL7-a pathumnaa awm mek Aizawl FC-in inkhel an thunun thei bik lo a, goal dang an khung belh thei loh avangin tun season I League match hmasa berah an chak lo.