Helicopter chesulah Leicester neitu a thi?

Leicester City neitu Vichai Srivaddhanaprabha chuanna helicopter chu a chesual a, King Power Stadium pawn lirthei dahnaah a tla.

Inrinni zanah Foxes chuan mualah West Ham United mikhualin 1-1 in an inhnehtawk a. Club neitu Srivaddhanaprabha chu ṭum danga a tih ṭhin dan ngaiin inkhelh banah khelmual aṭangin a thlawk chhuak a. Second rei lote hnuah helicopter-ah chiang lo awmin a chesual.

An tlakna hmun hi stadium aṭanga 200 metres vela awm a ni a, club staff-te lirthei dahna a ni. He thil thleng hmutu pakhat chuan, "Thil pawi a thlen loh ka beisei a. Amaherawhchu a alh nghal hluai a, an dam khawchhuah a rinawm loh," tiin a sawi.

Chetsualna thlenna hmun hi khar nghal a ni a, Leicestershire Police bakah Leicestershire Fire and Rescue Service ten hna an thawk nghal.

He thu ziah lai hian Vichai-a company King Power-in thuchhuah an la siam lo. Leicester club an thuchhuahah police leh hnathawk dang te an puih thu an sawi a, thuchiang an neih vat tur thu an sawi. Helicopter chesual leh a chhehvelah thi leh hliam tarlan ni lo mah se an dam khawchhuahna beiseina a erawh a chau hle.

Thil thleng avang hian nizan lama Leicester City leh Manchester United hmeichhe team inkhelh hun chu sawn nghal a ni. Nimin lam kha chuan stadium sirah club ṭantuten pangpar an dah a, footballer lar tak tak ten thil thleng pawi an tih thu an sawi.

Kum 60 mi Srivad-dhanaprabha hian fa pali a nei a, helicopter-ah hian tu nge chuang ve hriat a ni lo. Chutihrualin Leicester vice-chairman leh Srivaddhanaprabha fapa Aiyawatt chu inkhelh a en loh avangin chuang ve lo tura ngaih a ni.