Wembley-ah Man City

Zanin dar 1:30 hian Wembley Stadium-ah Manchester City an lenglut dawn a, an khelmual an siamṭhat mek vanga Wembley hmangtu Tottenham Hotspur nen Premier League match pawimawh an khel ang.

England-a khelmual hming-thang Wembley hi Pathianni khan NFL Game khelh nan hman a nih avangin Spurs leh Man City inkhelh hun tur hi sawn a ni a, American football khelh zawh hnua lawka football an khel zui tur hian sawi a hlawh a, ni dang angin phul (grass) a nung tawk lo ang tih chu thil chiang a ni.

Manchester City manager Pep Guardiola chuan, "Tottenham hian an goal venhim nan grass ṭha tak an nei tihna a ni dawn, sawisel kher a ṭul lo a, rang taka insiamrem nghal kan tum tur a ni ang. Duhthusam a ni dawn lo a, a nihna anga khelh thiam a ngai dawn, player tinin thil a nihna tak an man thiam a ngai ang," a ti.

EPL champion lai Man City hian hnehna an chang zo lo a nih chuan Liverpool lakah hmahruaitu an nihna an chan dawn, hei vang hian chak a pawimawh. Midfielder Ilkay Gundogan chu malpui hliam vangin an la chhawr thei dawn lo a, hliam tenau nei Fabian Delph erawh a dam tawh.

Shakhtar Donetsk nen Champions League an khelh ṭumin Kyle Walker chu bench aṭangin a inlan thei tawh a, Danilo a dam tawh bawk. Tun season chhunga a vawi khat nan Kevin De Bruyne chuan league match bikah bul a ṭan tura ngaih a ni.

Tottenham lam pawhin chanchin lawmawm an nei, match li chhung an chhawr theih loh Dele Alli chu a inlan thei tawh tura ngaih a ni. England international hi a dam ṭha a nih chuan Man City tlarhnung tana hnawksak thei tur a ni ang.

Spurs manager Mauricio Pochettino chuan, "Tun thlenga Wembley hman hi kan suangtuah dan a ni bik lo, he khelmualah hian NFL chauh lo pawh thil lian dang a thleng ṭhin, harsatna kan neih hi sawisel mai loin paltlang kan tum tur a ni. Eng dinhmunah pawh ding ila kan chunga sawiselna awm hi kan pawm thiam tur a ni," tiin a sawi.