Mizoramah Sangliana a chak ber

Mizo palian inchai champion lai Lalsangliana chuan tualchhung inchai chak ber a nih zia a lan tir nawn leh ta. Pro Wrestling 2018 khelh zawh takah Upper Republic Veng tlangval hian Philip Lalngaihawma chu round tinah chungnung zawk chungin a hneh.

Mizoram Wrestling Association buatsaih Pro Wrestling 2018-ah hian inelna chi hrang hrang - palian, palaihawl chung, palaihawl, pate chung, pate bakah hmeichhe huangah nute, nulaihawl leh nulian an tel bawk; Electric Veng YMA Hall-a inelna neihah hian infiammi 38 an fuankhawm a ni.

Palian

MWA palian champion lai Lalsangliana hi tun hnaiah amah khing zotu an awm lo. Excise & Narcotics Deptt. duhlai hian Kanan Veng tlangval lakah round tinah full point a hmu thei a, Mizo inchai huanga a vawi khat inlanna Philip tan tih theih a awm lo.

Kg 120 zeta rit Lalsangliana hian Mizo palian inchai zawnna hmasaah Saitual tlangval PB Lalnienga a lo hneh tawh bawk a, tun Pro Wrestling palian huangah hian mi pahnih chiah an inlan avangin inchai hi vawi khat bak neih a ni lo.

Inelna dang

Pate inchaiah Thenzawl tlangval B. Lalawmpuia chuan Bulfekzawl chhuanvawr Lalawmpuia chu an inhnehtawk hle a, round nga an khelh zawh hnuah round khat pek belh leh niin an la inhnehtawk cheu; in ban phawt hmanga chawk zawk zawn a nih hnuah Lalawmpuia a chak. K. Lalbiaksanga, Mission Veng leh Lallawmkima, Vaphaite ten palaihawl champion nih an inchuh a, tharum ngah Lalbiaksanga a chungnung.

Pate chung inelna huangah champion lai Saitual tlangval Lalchhanhima chuan Vanlalruata, Serchhip a hneh. Palaihawl chung bikah champion lai Lalrinawma chuan Jonathan Lalrinsanga a hneh bawk. Hmeichhe lamah Lalnuntluangi (nute), Lalvenhimi (nulaihawl), Lalmalsawmi (nulian) te an champion bawk a ni.

Results Kimchang
Mipa
Palian
Lalsangliana, Excise bt Philip Lalbiakchama, Kanan Veng
Palaihawl
Lalrinawma, Excise bt Jonathan Lalrinsanga, Zuangtui
Pate
B. Lalawmpuia, Thenzawl bt Lalawmpuia, Bulfekzawl
Pate Chung
Lalchhanhima, Saitual bt Vanlalruata, Serchhip
Hmeichhia
Nulian
Lalmalsawmi, Bawngkawn bt Lalbiakdiki Lelhchhun, Falkawn
Nulaihawl
Lalvenhimi, Khawhai bt Lalrinfeli, Kolasib
Nute
Lalnuntluangi, Kolasib bt Lalrinawmi, Kolasib