Imphal khawpui mawitu Enrique Esqueda

Sum ngah thar East Bengal-in tun season I League-a an match hmasa berah an sum neih an hmang sual lo tih an pholang nghal a, Enrique Esqueda goal hnih hmangin Neroca chu 2-0 in an hneh.

Kum 30 mi Enrique Esqueda hi Mexico tana vawi kua inlan thei striker a ni a, season hmasa thleng khan European top division-ah inlanin Polish club Arka Gdynia tan a khel a, Indian football-ah a tlangnel nghal hi a mak lo.

East Bengal-in hnehna an chan laiin an hmelma kumhlun Mohun Bagan erawh an mikhualna ramah an chak zo lo a, Gokulam Kerala nen goal khat ve ve khungin an inhnehtawk.

Didika hoin...

East Bengal coach Alejandro Menendez-a'n 4-4-2 formation hmangin player a rem a, Mizo tlangval Lalrindika Ralte chu captain armband hren tir niin Laldanmawia leh Lalramchullova ten inkhel bul an ṭan bawk.

Hetihlai hian Mizo tlangval pahnih Lalrozama Fanai leh Brandon VL Remdika chu bench-ah dah an ni a, Brandon hi second half-ah luhtir a ni. Costa Rica tana World Cup khel zo hlim Johnny Acosta leh Granada defender Borja Gomez Perez-te chu a laiah an inkawp a, Neroca tan a huphurhawm nghal.

Aizawl FC boss hlui Manuel Retamero hnuaiah Neroca-in 3-4-3 formation an hmang a, Malemnganba Meitei, Felix Chidi leh Subash Singh-te chu tlarhmaah inkawp tirin 'tiki taka' pholan an tum a, midfield laiah Katsumi Yusa leh Tondomba Singh te inkawp tir an ni.

Team ṭha zawk

Neroca-in football mawina pho chhuakin passing game hmuhnawm an khel a, East Bengal-in goal khung tuma an nawr nghal bawk avangin game a hmuhnawm hle - vannei zawk erawh East Bengal an ni.

Minute 10-na lekah Esqueda chuan goal hmahruai a khung a, Khuman Lampak Main Stadium-a mipui thawm a reh hma hle. Neroca-in nawr let ṭhin mah se tlarhnunga Acosta leh Fernandez inkawp an su tlang hleithei lo a, EB bawkin goal an khung.

Mizo tlangval Danmawia chu penalty area-ah tih tluk a ni a, Sialhawk Express-in penalty a hlawh chhuak. A pet turin Esqueda a lo pen chhuak a, Mexican striker tan khung harsa a ni lo - 2-0 in East Bengal an chak.

Kim Kima a vanduai

Inirnni zan I League inkhelah Gokulam-in Mohun Bagan an mikhual a, Kolkata club hian Henry Kisekka hmangin goal hmahruai khung mah se defender Lalchhawnkima chuan an lamah a ti lut palh a, goal dang lut loin point khatah an lungawi a ṭul.

Kim Kima hian Mudde Musa pet goal ngei tur nia lang chu goalkeeper awm loh hnuah ṭha takin tauh chhuak mah se Eze Kingsley chet ṭhat tawk loh a tuar a, Aizawl FC defender hlui hian ball a petchhuah theih loh avangin Arjun Jayaraj-a shot chuan Kim Kima a per a, goal-ah a lut.

Mohun Bagan-in point khata lungawi duh loin William Lalnunfela chu bench aṭangin an luhtir a, mahse Kolasib striker hian goal-a ken tel bik loh avangin 1-1 in an inhnehtawk ta a ni.