Juventus thawhlehna Ronaldo

Cristiano Ronaldo chuan Serie A champion Juventus tan goal hnih khungin dinhmun hniam zawka an din hnuah Empoli 2-1 in an hneh. Turin club hian league match 10 an khelh tawhah tlawm an la nei lo a, point 28 hmuin hmahruaitu an ni chhunzawm zel.

Empoli erawh season ṭan nia hnehna an chan bak hneh an la nei leh lo, season hmasa Serie B champion tan striker Francesco Caputo-a'n minute 28-naah yard 16-a hla aṭangin goal hmahruai a khung chu chawlhlawk thleng an hum tluan thei a; a hnu lamah erawh Ronaldo an ngam lo.

Hei le, Ronaldo

Second half ṭan tirah Empoli midfielder Ismael Bennacer-a'n Paulo Dybala a tih tluk vangin penalty a chawi a, Juve captain armband hrengtu hun ṭha hlawh chhuah hi Ronaldo-a'n an si phurh sut nan a hmang.

Portuguese forward Ronaldo-a'n a la duhtawk mai lo, minute 70-naah tun hma lama a tih fo tawh angin yard 25-a hla aṭangin kil takah goal ṭha bik a khung leh - pound maktaduai 99 man hian a hlutna ang a pet chhuak chho mek zel.

Real Madrid forward hlui hian Juve tan match 12 a khelh aṭangin goal sarih a khung tawh a, a ṭhiante khung tur vawi thum a siamsak bawk. A zawna season sarih champion tawh hian point sarih zeta hma an hruai fal leh tawh avangin an nomawi kawl lai an hum leh ngei dawn niin a lang tawh.

Juve an ṭha

Inkhelh dawn hnaiah Juventus captain Giorgio Chiellini chu harsatna tenau neih vangin a inhnukdawk a, Italian defender aiah hian tun season chhunga a vawi khat nan Daniele Rugani dah luh a ni a, a bulah Leonardo Bonucci a la din tho avangin thlaphanna tur a awm lo.

Tlarhmaah Ronaldo, Paulo Dybala leh Federico Bernardeschi te an inkawp thei a, anni thlawp tur hian Miralem Pjanic an nei bawk. Bianconeri-in inkhel an thunun hneh hle a, kualmualah goal khat chhuah mah se Champions League khel a zin chhuak hlim tan club dang hneh zui nghal hi result ṭha a ni.

Kum 33 mi Ronaldo chuan, "Kan tan chuan chawlhkar duhawm tak a ni. Manchester United lakah sawisel tur awm lo khawpin kan khel tawh a, chumi hnuah hnehna kan chang leh thei. Goal kan chhuah hnuah kan nawr na sawt a, second half-a kan beih let dan tlir kir kha chuan a lungawi thlak hle a ni," tiin a sawi.