Electric Veng leh Ramhlun North inhnehtawk

Zirtawpni zan khan Mc Dowell's No. 1 Soda Mizoram Premier League-ah Electric Veng leh Ramhlun North an inkhel a, 1-1 in an inhnehtawk.

Electric Vengin Vanlalrem-sanga hmangin minute 27-naah hma hruai mah se Ramhlun North-in Lalnunmawia hmangin an sut a, goal dang a luh belh lo. Inkhel result avangin EFC-in semifinal an hnaih sawt a, Ramhlun North tan erawh knockout stage kawng a zim tawh hle.

Inkhel chu

Electric Vengin match hnuhnung berah Chhinga Veng an hneh lo a, Ramhlun North erawhin a vawi khat nan hnehna an chang thung. Team pahnih point dinhmun inthlau mah se EFC chu chak zawk tura dah an ni chuang lo a, MPL7 top scorer ni mek David Lalchhuanawma inhliam bawk avangin point hloh thei dinhmunah an ding.

Amaherawhchu, foreigner pathum leh Mizo player langsar lakhawmtu Ramhlun North-in beisei an pha lo chhunzawm zel a, inkhel inhnehtawkah keeper chesual hman ṭangkaiin Vanlalremsanga'n Electric Veng hmahruaina goal a khung. First half-ah EFC an chungnung zawk.

Second half-ah Ramhlun North an insiam

ṭha a, nunna thar neiin an goal nawr a na sawt. Minute 62-naah Mawitea'n a hun ṭha neih chu goal-ah petin defender-in a khawih per avangin Electric Veng keeper tan dan ngaih a awm lo. Hun tawp thlengin an innawr tawn a, goal a luh belh loh avangin point khat ve ve an insem.

A ngaihnawm chho

MPL round kua khelh zawh a ni tawh a, match nga chiah khelh hmabak a awm chungin Chhinga Veng chiahin semifinal an lut a, paruknaa awm Chawnpui FC thengin beiseina nung tak a la awm.

Electric Veng hian table mawnghphaha awm Bethlehem Vengthlang nen Nilaini tlaiah an inkhel ang a, hnehna an chang a nih chuan semifinal an sawi ri ngam ang. Point thum an hlawh chhuak lo a nih chuan an hma bakah Chanmari FC, Aizawl FC, Chawnpui leh Mizoram Police te an awm avangin semifinal thleng lo thei an la ni.

Ramhlun North erawh an hnuaia awm BVT vawi hnih an hmachhawn tawh a, an chunga awm vek an hmaah an awm dawn avangin relegate pumpelh chu an hna ber a ni tawh ang.