Serpents aia huai zawk Vikings

Mizoram Super League khelh mekah Zirtawpni zan khan Mission Veng Vikings leh Zarkawt Serpents ten an match hmasa ber an khel a, MSL 3 champion Vikings lamin kai thar lakah 76-67 in hnehna an chang.

Hawla Indoor Stadium, Republic Vengthlanga inkhelah Mission Veng Vikings lam hi quarter hmasa pathumah an chungnung zawk vek a, quarter linaah hniam zawk mah se hnehna chan nan a tawk.

Vikings tan hian Dijon Najee Farr chuan beisei ang ngeiin danglamna a siam nghal, American player hian point 32 a score bakah rebound vawi 13 lain tualchhunga basketball inelna sang bera a inlan vawi khatnaah double-double a nei nghal; an khingpui lamin basket an neih tur vawi li a block sak bawk avangin tlamuanpui tham a tling.

MSL 3-ah khan Vikings hian Ronald March an nei a, inter state player an neih hi a thiam fal em avangin an champion pui. Kuminah pawh Farr hi player en bik tur a ni ang, chutih rualin club dang pawhin ani elphak tur an neih tawh avangin tun hma ang ngawt chuan thil a awlsam tawh kher lo ang.

Zarkawt Serpents lamin season hmasa lamah nomawi pathum chawi chungin MSL atan an tling a, chutih rualin player panga chiah MSL sulhnu nei an neih avangin Vikings lakah an tawnhriat neih tlemna a lang. Tualchhung player khaiding tura lakluh Sahil Sharma (7pts) leh Ravi Bhardwaj (4pts) ten training an la chhim mumal lo a, beisei an la phak rih lo a ni.