Cardiff lakah Liverpool chak nuamsa
Liverpool-in an mikhual Cardiff City laka hnehna chang turin harsatna an tawk lo a, Inrinni zan khan Anfield-ah 4-1 ngawtin an lo sawp.
Jurgen Klopp-a nauten match 10 chhung hneh loh tawng loa an kaltluan tak avangin Premier League table chung ber an luah nghal a, zanina Manchester City leh Tottenham Hotspur inkhel result a zirin an dinhmun erawh danglam leh thei a ni.
Liverpool tan Mohamed Salah chuan 'one season wonder' tia amah sawiseltute goal hmangin a chhang leh ta a, goal khat a khung bakah assist vawi hnih a nei bawk.
Sadio Mane chuan buaipuitham a nih zia pholan chhunzawm zelin goal hnih a khung a, bench aṭanga luhtir Xherdan Shaqiri chuan Liverpool tana a goal hmasa ber a khung ve nghal bawk.
Goal khung te lek lek!
September fixture hautak hmachhawn a, match li ngawt a zawna an chak zawh tawh loh hnuah Liverpool-in match thum chhung chu a zawnin hnehna an chang leh ta a, match thum chhung hian goal kua khungin vawi khat chiah an chhuah!
Inrinni zanah pawh Liverpool-in goal khung turin an nghah rei a ngai lo. Minute 10-na lekah Salah chuan Cardiff City tlarhnung pherh zarzoin goal hmahruai a khung a, Anfield-a Premier League match 24-a khelhah goal 33-ah a inrawlh ta - vawi 23 pet goalin vawi 10 assist a nei thei.
Liverpool-in an goal hnihna hlawh chhuak turin second half an nghah thlen a ngai a, minute 66-naah Mane chuan Cardiff defender rual a bum kual hnuah chiang zetin an goal hnihna a khung. Player 'class' bik goal a ni.
Merseyside club hi mahni khelmualah nuamsa takin an chak mai dawn niin a lang hman a, beisei ang erawh a ni lo. Callum Paterson chuan target-a shot an neih hmasak ber chu goal-ah a chantir a, Liverpool-in Anfield-a league match 10 chhung goal chhuah lo record siam an tum chu a tihtawp sak.
Mahse maw...
Liverpool fan-ten goal khat chiahin an him tawh tih an hria a, an hlauthawng - Cardiff fan-te an phur zual sauh thung a, Anfield-ah point hlawhchhuah theih ngei an inbeisei.
Mahse, Cardiff fan-ten an goal neih chu point hlawhchhuahpui tur niloin Reds chheih kawlhna goal mai a ni tih an hre lo. Bench aṭanga luhtir Shaqiri chuan minute 84-naah Salah ball duhthusam chu goal-ah a chantir a, Anfield-ah a in sawhnghet zel.
Anfield hlim authawm a reh fel hman lo. Salah bawk kan hmu chhunzawm a, Egyptian forward hian Mane tan defender ven karah ṭha zetin ball a siamsak a, Senegalese forward hian harsatna nei loin goal-ah a chantir.
Cardiff beiseina chu minute rei lote chhungin ṭhiah sak a ni a, chak phu zawkin hnehna an chang - mikhual team hian Liverpool penalty area-ah vawi hnih chiah ball an tawk fuh ve!
A hma mah mah
Liverpool-in Premier League-ah hma an hruai a, Manchester City result a zirin an dinhmun a danglam leh vat thei tih Jurgen Klopp-a'n a hria a, a
ṭawng pawr duh lo.
Reds manager chuan, "Result ṭha tak tia han sawi vul hluai tur a ni lo a, mahse point 26 neih tawh hi chu a ṭha khawp mai," tiin a sawi a, "Darkar 24 chhung hmahruaitu nih chu a châkawm ve bawk alawm," tiin fiamthu a thawh zui.
Liverpool hi 2008-09 season khan Premier League-ah pahnihna an ni a, Steven Gerrard leh Fernando Torres te vanglai niin league match 10 an khelh hmasakah vawi riat hnehna changin vawi hnih an khingpui an draw a, he record hi an nihrual leh ta chiah.
2008-09 record khum tur erawhin Liverpool tan hna a hautak sawt dawn a, kartawp Inrinni zanah tun hnaia 'form' em em mai Arsenal chu Emirates Stadium-ah an lenchilh ang.