Grassroots Festival neih a ni

All India Football Fede-ration (AIFF) leh Mizoram Football Association (MFA) te ṭangkawpin Grassroots football an kalpui chhunzawm zel a, Inrinni khan Grassroots Festival hlimawm tak Lammualah neih a ni.

Tun ṭum hi Mizorama AIFF-MFA Grassroots batch 19-na an ni a, naupang 200 chuang awmin thla thum chhung football zirna an kalpui kharna atan Grassroots Festival hi buatsaih ṭhin a ni a. Kum 6-12 inkar naupangte chu an kum mil zelin group hrang hrangah ṭhen an ni a, khelmual pali siamin hlimawm takin football an khel a, tlaiah zanriah an kilho bawk

MFA Grassroots and Youth Development Committee chairman PC Vanlalhruaia chuan, "Kum 2012 aṭang khan chawl loin Grassroots football hi kan kalpui ta a, kan la phurin kalpui chhoh zel kan tum. Festival hlimawm tak pawh buatsaih zel kan tum bawk a ni," a ti.

AIFF Development Officer Samson Rameng-mawia chuan, "Grassroots football changtlung zawk, naupangin nuam an tih zawk tur buatsaih chhoh zel kan tum a, kan kalphungte pawh hmasawn chhoh zel kan beisei," tiin kalphung ṭha zawk duan an tum thu a sawi.