Suarez hmaah Real an zawr
Cristiano Ronaldo leh Lionel Messi tel lohna El Clasico chu Pathianni zan khan Nou Camp-ah khelh a ni a, Barcelona-in an hmelma Real Madrid 5-1 in an sawp. La Liga match 10 khelh tawhah Barca-in point 21 hmuin hmahruaitu an ni a, Real Madrid erawh point 14 chauh hmuin pakuanaah an awm thung.
Barca tan Philippe Coutinho-a'n goal hmahruai a khung zawhah Luis Suarez-a'n hattrick a siam a, subsitute Arturo Vidal chuan tawp a rawn khar. Real tan Marcelo chuan 2-0 a nih laiin goal khat a khung ve a, amaherawhchu Brazilian wing back goal hi mualneitu fuih phurhna chauh a ni.
Second 92!
Barcelona-in minute 11-na lekah Coutinho hmangin goal an khung a, Jordi Alba pass ṭhat zia leh Liverpool midfielder hlui 'cool' zia chu hmuh theih a ni.
Amaherawhchu he goal hi chik lehzuala thlir chuan Catalan club hian goal luh hma hian second 92 zet ball an chang. French defender Clement Lenglet-a'n Real player ball a chhuhsak hnuah keeper Marc-Andre ter Stegen a pe a, hemi aṭang hian inṭan chhoin vawi 30 zet ball an inpe kual.
Game thlaktu VAR
FIFA World Cup aṭangin VAR kalhmang khawvelin a hrechiang lehzual a, minute 30-naah El Clasico-a VAR hman hmasa ber hmangin Suarez-a'n a khung. Real defender Raphael Varane chuan Uruguayan forward chu box chhungah a titlu a, referee-in penalty-ah ngai loin khelh chhunzawm tir mah se VAR hmangin thutlukna a thlak.
Belgian keeper Thibaut Courtois-a'n Suarez petna lam ring dik mah se a kil em avangin a dang thei lo. Nou Camp-ah Ronaldo tel ve lohna Real Madrid chu VAR vangin dinhmun harsa zawkah an ding a, an thawhchhuah theih a beiseiawm tawh loh.
Beisei nei Real
Second half-ah Real Madrid khel a nung thar a, na taka an nawr let avangin Barcelona dinhmun him tawh chu an sawi nghing pha. Los Blancos-in attack na tak aṭangin goal an hlawh chhuak a, minute 50-naah Marcelo-a'n box chhungah ball per chang fuhin a pet goal chiang hle.
Real goal nawr a na zui a, Luka Modric chuan goal ban tih per chu goal chhungah lut se inkhel hmang a dang thei ang. Amaherawhchu VAR vanga goal an chhuah miau avangin goal nawr chhunzawm a ngai a, mawi hnai taka chak loh aia risk lak an thlang a, an duhthlanna chuan mualphona a hruai thleng.
A hming chu Suarez
Barcelona-in squad tih chak nan tun hnaiah pound maktaduai 135.5-in Ousmane Dembele an lalut a, pound maktaduai 142-in Coutinho an lalut bawk a, mahse Lionel Messi awm loh laia team chhandamtu chu Luis Suarez a ni.
Uruguayan forward Suarez pawhin goal ban a tih per hnuah minute 75-naah a goal hnihna chu hla zet aṭangin a tauh lut a, minute riat hnuah hattrick-na tur goal chu cool takin Courtois a chip khum a, El Clasico-a a hattrick hmasa ber niin a fapa tan a hlan.
Suarez hian a kawr hmaa 'Welcome Lauti' tih inziak kawr chu a pholang a, Uruguayan forward hian kar liam ta Thawhlehni khan a fa pathum nan fapa Lautaro a nei a ni.
An au el ta
Real Madrid tlarhnung talbuai an insiamṭha thei lo a, Barca an phur tulh tulh avangin goal dang a luh belh leh. Substitute Vidal chuan Barca goal ngana a tauh lut a, injury time-ah Dembele-a'n goal rukna tur a hlah thung.
Barcelona ṭantute chuan, "Spain enkawl turin Lopetegui kan duh" tiin deu sawh takin an au rual a, hei hian El Clasico an ngaihven em em na chhan a pholang tel bawk. Real leh Barca inkhel hi khawvel club ṭha pahnih inkhelh vang chauh ni loin Spain aṭanga indang duh Catalan club leh Spain khawpui Madrid club inkhel a ni a, hnam thil a ni.
An sawp tawh ṭhin Barca hian kum 1994 khan Nou Camp-ah 5-0 in Real hi an hneh tawh a, Madrid-ah 1974 khan 5-0 thoin an hneh tawh. Tun hnaiah pawh Santiago Bernabeu-ah ṭum hnih an sawp a, kum 2009 khan 6-2 in khualmualah hnehna an chang a, 2015-ah 4-0 in an chak bawk.
Catalan club manager Ernesto Valverde chuan, "Risk an lakna tak kha keini lamin kan hmang ṭangkai ta zawk a ni," tiin a sawi. Real manager Julen Lopetegui chungchang sawiin Barca boss chuan, "A dinhmun harsa tak hi ka hriatthiam pui a, pawi ka ti bawk. Kei pawh hi naktuk emaw kar thum hnuah emaw chuan hetiang dinhmuna ding ve thei tho hi ka ni," tiin football coach nih hau tak zia a sawi.