Nomawi 99 chawi thei Federer

Roger Federer chuan tennis a khelh hun chhungin nomawi 99 zet a chawi tling ta. Pathainni zan khan Federer hian Marius Copil chu 7-6 (7-5), 6-4 a hnehin a vawi kua nan Swiss Indoors title a la.

Kum 37 mi Federer hian 2006 khan a vawi khat nan Swiss title hi a la a, tun ṭuma a khingpui Copil-a erawh final a khelh vawi khatna chiah a ni thung; set pahnih an khelh hun chhungin world number 3 Federer hian a service chhuhsak ve vein darkar khat leh minute 34 chhungin hnehna a chang.

St. Jakobhalle-ah Federer inkhel en turin mipui 12,000 zet an fuankhawm a, an ramah ngei nomawi a chawi chiah chuan lawmpuina thawm a ring ṭha hle. Federer hian ATP Tour bikah hian final vawi 151 tawhin; tennis a chawlhsan lo a nih chuan nomawi dang pawh la chawi leh thei tura ngaih a ni.

Tennis season tawpa khelh tur ATP Finals khelh tur a la hriat kim lo a, Erste Bank Open champion Kevin Anderson chuan London pan theihna ticket a nei ve leh chiah. South African tlangval hian Kei Nishikori chu 6-3, 7-6 (7-3) a hnehin nomawi a chawi.

ATP Finals khel tur hian Anderson hmaah Federer, Rafael Nadal, Novak Djokovic, Juan Martin del Potro leh Alexander Zverev te an tling tawh a, hmun ruak pahnih la awm hi Paris Masters khel zinga player cheṭha aṭangin hnawhkhah theih tur a ni ang.