Lopetegui an ban dawn?

El Clasico-ah Real Madrid an mualpho avangin coach Julen Lopetegui chu ban theih dinhmunah a ding a, Spanish chanchinbu Marca thuziak a dik a nih chuan he thu inchhiar meuh chuan an ban thei tawh bawk.

Lopetegui hian hlawh-tling takin Spain team a enkawl a, amaherawhchu Spanish FA hriatpui loa Los Blancos nen inremna an neih avangin FIFA World Cup ṭan hmain mualpho taka ban a ni.

Real Madrid-in Lopete-gui chungah beiseina sang tak nei mah se an thlen chin erawh a sang lo. La Liga-ah match 10 khel tawhin vawi li an chak a, hetiang zat bawk hi chak loin ṭum hnihah erawh an inhnehtawk a, pakuana dinhmun chauh an hauh pha.

Barcelona an hneh loh zawhah Lopetegui chuan, "A pawi ka ti takzet a ni. Amaherawhchu ka hna chhunzawm turin chakna ka nei a, dinhmun ṭha zawka hruai theih hi ka inbeisei tlat a ni," tiin a hna chan a duh lo thu a sawi.

Amaherawhchu chan-chin thehdarhtu lam chuan Lopetegui thlakna tur an inrinsiak a, Chelsea manager hlui Antonio Conte chu hming langsar ber niin Real hotute leh Italian manager hi an inbia nia sawi a ni.