Police hmaah Chhingcows

Mizoram Police-in zanin dar 7:00 hian Mizoram Premier League Season 7-ah champion lai Chhinga Veng an hmachhawn dawn a, tun season-a an intawn hmasak zawk

ṭumin Chhingcows 2-0 in an chak a, tun ṭuma an inkhel tur hian nghawng lian tak a nei ang.

Police hian match hnuhnung berah Chawnpui FC an hneh loh avangin semifinal khel thei dinhmunah ding mek mah se point an hloh hrim hrim chuan a sang pali aṭangin an chhuak thei a. Chhingcows erawh knockout stage khel tura an tlin tawh avangin nuam sa takin an khel thei tawh thung.

Chak inbeisei Police

Police coach Lalbiaksanga Colney chuan "Chhinga Veng hi hneh theih lohna tur a awm lo. An khelh tawhna hi thlir ila, an chakna zat hi goal khat te te a ni hlawm a, vanneih a tel a ni," tiin Vanglaini a hrilh.

Chhinga Veng hian match kua khelh tawhah hneh loh an la tawng lo a, Lalsangzuala Hmar hote hi vawi sarih chak tawhin vawi hnih an inhnehtawk. Chutihrualin Police coach BS-a Colney sawi ang hian Chhingcows hian Police tih loh chu an hnehna chanaah hian goal khat chauhin an hneh a, a thusawi hi statistics-in ṭawmpui mah se MFA Super Cup leh I Day Football-a vawi hnih champion tawh leh MPL champion lai tan 'vannei' tih ṭawngkam hi hriat nuam a ni lo ang.

Police team hi hriatthiam har tak an ni a, zanin hi an ṭhat ṭum a nih chuan chak zawk tura rinkai an ni a, chutihrualin an squad kim loa an khel a nih chuan point khat hmuh pawh a lawmawm thung ang.

Foreigner kawl Chhingcows

Chhinga Veng hian tlarhma tih chak nan foreigner an lalut a, match hnuhnung bera Chanmari nen goal awm loa an inhnehtawk ṭumin Ivorian forward Gatch Diomande an chhawr ṭan a, champion nawn an tum tih phat rual a ni lo.

Coach Lalsangzuala Hmar chuan, "Kan tan chuan kan player-te inhliam an dam vat vat hi a pawimawh a, kan player neih sa hi hliam belh tawh lo se kan ti. Chutihrualin fimkhur tak siin kan inkhel apiang kan hmachhawn ang a, chak tumin kan khel zel ang," tiin Vanglaini a hrilh.

Foreigner chungchang pawh sawiin Sanga chuan, "Minute 90 khel tur chuan a la tlak lo a, amaherawhchu inkhel bul ṭan thei erawh a ni tawh," tiin a sawi a, defender Vanlalzuidika te an dam tawh bawk avangin Police tan khelh an harsa dawn.

# Team Pld W D L GF GA GD Pts
1 Chhinga Veng FC 9 7 2 0 11 3 8 23
2 Electric Veng FC 9 5 2 2 13 9 4 17
3 Aizawl FC 9 4 4 1 16 9 7 16
4 Mizoram Police 9 4 0 5 12 10 2 12
5 Chawnpui FC 9 2 5 2 10 10 0 11
6 Chanmari FC 9 3 2 4 9 12 -3 11
7 Ramhlun North 9 1 3 5 10 19 -9 6
8 Bethlehem VT 9 0 2 7 8 17 -9 2