Aizawl FC inlan lehnghal dawn

Vawiin tlai dar 3:00 hian Aizawl FC chuan Mizoram Premier League Season 7-ah Ramhlun North an hmachhawn dawn a, Gift Raikhan hote hian Pathianni zan khan I League match hmasa berah Shillong Lajong 2-1 a hneh loin nimin khan Aizawl an rawn thleng.

I League club-in team kima training-na hun an neih loh laiin an khingpui tur Ramhlun North erawh kar liam ta Nilainia match an hneh hnuah an la awl a, team ṭha zawk hriatthiam a har ta hle. AFC harsatna belhchhah tur hian Mizo club hian tun Inrinni hian Mohun Bagan hmachhawn turin an zin chhuak nghal dawn a, November 1-a Chhinga Veng nena an inkhel tur chu November 19-ah sawn a ni.

AFC coach Gift Raikhan chuan, "Fixtures hi kan tan chuan a ṭha lo a, chutihrualin final hun duan fel vek tawh a nih avangin MFA tan pawh ruahmanna dang siam a har ang tih kan hriatpui a. Chuvangin keini pawhin kan squad neih chhah kan hman ṭangkai ve a ṭul dawn a ni," tiin Vanglaini a hrilh.

Chutihrualin Ramhlun North tan ngaih ṭha taka awmna chi a ni lo a, AFC hian Bethlehem Vengthlang lama chakna goal khungtu Hmangaihkima bakah hming langsar Lalkhawpuimawia, Lalruatfela Zote leh MPL-a best keeper a zawna vawi li ni thei Lalawmpuia te pawh Shillong-a hruai loh zingah an tel a, an squad a chhah ṭha hle.

Ramhlun North-in hrem vangin an foreigner pathum zinga an chhawr rim ber Waheed Adekunle an hmang dawn lo a, amaherawhchu semifinal beiseina nei tur emaw relegate pumpelh tura point thum an mamawh avangin chak tumin an khelh a ṭul dawn a, Aizawl FC tum dan nen a inang chiah. I League club hian point 16 hmu tawh mah se semifinal dinhmun a la chiang lo a, I League khelh tur a hau tak bawk avangin knockout stage thlen vat an duh ang.