Yamaguchi leh Chen Long an champion

Badminton inelna zinga ngaihhlut pakhat French Open chu Pathianni zan khan khelh zawh a ni a, mipa leh hmeichhe singles-ah Chen Long leh Akane Yamaguchi ten nomawi an chawi.

World champion vawi hnih ni tawh leh Olympic champion lai ni bawk Chen Long chuan 2016 champion Shi Yuqi chu 21-17,21-19 a hnehin a champion a, Chinese shuttler hian badminton a khelh hun chhungin nomawi 30 a chawi tawh.

Chen Long hian game hmasa berah 11-8 a hma hruaiin harsatna a tawk lo a, game hnihnaah pawh a tir aṭanga chungnung lehin minute 47 an inkhelh chhungin dinhmun hlauhthawnawmah a ding ve lem lo.

Mipa singles final hma hian doubles khelh a ni a, mixed doubles huanga world champion ni lai Zheng Siwei leh Huang Yaqiong te chuan Seo Seung Jae leh Chae Yujung te chu minute 37 chhungin 21-19, 21-14 in an hneh - kumin chhunga title pariat an lakna chiah a ni nghal. Mipa doubles-ah Han Chengkai leh Zhou Haodong ta ṭangdun an champion bawk.

Hmeichhe singles final a hmuhnawm a, season hmasa lama nomawi inchuhtu pahnih inkhel nawn lehin result erawh a letling tawh thung. Akane Yamaguchi chuan nikuma a hneh loh world number 1 Tai Tzu Ying chu 22-20, 17-21, 21-13 in a hneh a, nomawi inchuhna inkhel hi darkar khat leh minute riat ngawt an khel.

French Open-ah hian Indian shuttler langsar Saina Nehwal, P.V. Sindhu leh Kidambi Srikanth te pawh an inlan vek a, mahse semifinal thleng zo loin an tla vek a ni.