Formula 1 champion Lewis Hamilton

Lewis Hamilton chu tun season Formula 1 champion a ni ta. Mercedes driver hian car intlansiakna sang bera vawi nga champion thei Argentine legend Juan Manuel Fangio a nih rual chiah a, vawi sarih champion thei Michael Schumacher chiah tluk loh a nei tawh.

Pathianni zana tlan zawh tak Mexican Grand Prix-ah Hamilton hi palina a ni a, mahse season a hman ṭhat em avangin pasarihna chin a thlen phak chuan a elpuite tan table-ah umphak theih a ni tawh lo. Britain tlangval hian a mamawh ang tawk point a hmuh belh a, driver ropui berte huangah a hming a ziak zui bawk.

Mexican Grand Prix-ah Red Bull driver Max Verstappen chu pakhatna a ni a, a hnungah hian Ferrari driver pahnih Sebastian Vettel leh Kimi Raikkonen te an thleng; Hamilton-a'n tyre lamah harsatna nei mah se huaisen takin inelna a hmachhawn a, mipui 135,000 hmaah ropui taka ngamtu a ni.

Vawi nga chu

Lewis Hamilton hian 2008 khan a vawi khat nan F1 nomawi a chawi a - 2014, 2015, 2017 leh 2018-ah te nomawi a chawi zui leh. Tunah kum 33 mi a ni a, a elpui ber Vettel hi vawi li a champion tawh thung; driver pahnih hian sulhnu ropui an hnutchhiah chhunzawm ngeiin a rinawm hle.

Champion nomawi humhim thei Hamilton chuan, "Tunah chuan a hlimchhawn lutuk avangin sawi tur a vang. Hlawhtlinna hi season tluana kan thawhrimna vang a ni, keimah chauh hetiang thleng thei hi ka ni lo, team chhunga mi zawng zawng te nen kan thawhhona ṭhat vang a ni.

"Tun ṭum kan inelna hi intlansiak hriatthiam har leh hautak tak a tling, a bul ṭan fuh hle mah ila a hnu lama thil thleng khan min ti buai hle. Mahse, rilru fim tak pu chungin a tawp thlen kha ka tum tlat a ni," tiin a sawi.

Vettel-a'n a lawmpui

Sebastian Vettel hi tun lai khawvela driver ṭha leh hmuhnawm bera ngaitu an ṭhahnem a, ṭantu pawh a ngah hle. Mahse, German driver hian amah tihsual a tuar fo a, ho lam taka point paih a neih fo avangin season chawhnu lamah Hamilton nen an inthlau hle.

F1 vawi li champion tawh Vettel chuan, "Season tluana tlan ṭha ber chuan hnehna a chang ta, a hun tawn mekah Lewis hi kan lawmpui a, mi bik leh danglam tak a ni. Ani chu a beidawng ve ngai lo a, hun harsa a tawh zawh chiaha huaisen taka a rawn thawh chhuah leh theih ṭhin avangin chak hi a phu a ni.

"Kan team pawhin season kan hmang chhe hran lo, chutihrualin Italian leh Singapore Grand Prix-ah te kan che fuh tawk lo a, a hnu lamah kan buai phah ta deuh a ni," a ti. Ferrari driver pakhat zawk Kimi Raikkonen pawhin hmasawn an mamawh thu a sawi ve bawk.