Leicester neitu Vichai Srivaddhanaprabha a thi

Vichai Srivaddhanaprabha a awm ta lo - Leicester City neitu, sumdawng hausa Vichai Srivaddhanaprabha chuan a chuanna helicopter chesual avangin a nunna a chan a, football khawvel rohlu pakhat chu a herliam ta.

Inrinni zan khan Leicester hian an mikhual West Ham chu goal khat ve ve khungin an inhnehtawkpui a, Srivaddhanaprabha chuan inkhel hi a hmunah a en.

Ṭum danga a tih ṭhin dan angin inkhelh zawhah helicopter-in a chenna London lam a pan a, mahse second reilo te hnuah helicopter-ah chiang lo a awm a, club staff-te lirthei dahna hmunah a chesual zui.

Leicester City-in Srivaddhanaprabha chung-changah thuchhuah an siam lawk lo a, thuchhuah an siam hmasak ber erawh a thih thu a ni - football khawvel a ngui a, hmun hrang hrang aṭanin Vichai uina thuin Leicester a thleng.

Foxes hi zaninah Southampton nena League Cup last 16 khel tura tih an ni a, mahse Vichai thihna avang hian inkhelh hun hi sawn rih a ni.

Pa 'zakzum'

Vichai Srivaddhanaprabha hian mize danglam tak a nei a, chu a mizia pakhat chu 'media a hmachhawn tam ngai lo' kha a ni a, a chawr chhuahna Thailand-ah meuh pawh a nazawnga media hmachhawn a duh lo.

Hei vang tak hian Leicester City neitu meuh ni siin hriat a hlawh tawk lo a, mipui vantlang hmuha langsar taka in pholan ai chuan a nun chu 'private' taka hman duh mi a ni.

BBC South East Asia correspondent Jonathan Head chuan, "Interview hmachhawn hi a duh meuh lo a, hei vang hian amah hriat chian chu thil harsa tak a ni," a ti.

Vichai hian hmingṭhatna a neih langsar tak erawh mi chanhai leh ṭanpui ngai zawkte tana a sum a ui ngai lo hi a ni. Leicester khawpuia hospital leh naupang enkawlna hmunah te sum tam tak a pe a, mi harsa zawkte khai chhuak turin a sum a ui ngai lo.

Leicester ropuina Vichai

King Power International Group chairman leh neitu ni bawk Vichai hian kum 2010 khan Foxes hi pound maktaduai 39-in a lei a, leiba an neih zawng zawng a rulh sak bawk.

Foxes-in hma a sawn theih nan sum tam tak a seng a, kum li hnuah Premier League khel turin a hruai kir leh thei. Kum 2014-a top flight football an khelh dawn hian Vichai chuan, "Kum thum chhunga top five team nih kan tum," a ti.

Vichai hian a thil tum hlawhtlin tir tumin tawnhriat ngah Claudio Ranieri chu Foxes enkawl turin a lalut a, club head of recruitment Steve Walsh chungah rinna nghatin a tisual lo hle bawk.

2015-16-season a thlen meuh chuan Leicester neitupain a beisei aia hmain hlawhtlinna a chhar a, infiamna chanchina thil thleng ropui ber ang hiala chhal ngam thlengin Leicester City chu Premier League champion an ni.

Fan-te ngainat

Vichai-a'n Leicester neitu a nih chhunga a sulhnu hnutchhiah pakhat chu fan-te nena an inngaina em em mai kha a ni a, a piancham lawmna pawh fan-te nen an nei ṭhin.

Pound tluklehdingawn 2.9 ngawt sum nei nia an sawi Vichai hian a pianchamah chuan inkhel entu fan-te zingah a thlawnin cake a sem ṭhin a, in tur leisakin a sem a, khualmuala an team zuitu fan-te chu zing chaw a lei sak a, scarve a pe ṭhin bawk.

Leicester City Supporters Club chairman Cliff Ginetta chuan, "Vichai chhungkua hi Leicester mipuite zingah chuan an tla na em em a, he club leh khawpui tana an hnathawh zawng zawng avang hian lawm an hlawh em em mai a ni.

"Khawvel hriatah Leicester an pho chhuak a, club tan sum tam tak sengin damdawi In leh naupang enkawlna hmunah te pawisa an thawh a, Krismas-ah ni se, fan-te tan eitur tuihnai tak tak a thlawnin an sem ṭhin," a ti a, Vichai a ui hle.

Nunna chân te chu
Leicester neitupa heli-copter chesualah hian mi panga an chuang a, an vai hian an thi vek. Vichai Srivaddhanaprabha bakah hian a staff pahnih Nursara Suknamai leh Kaveporn Punpare-te chu a hmunah an thi nghal a, pilot Eric Swaffer leh a kawppui Izabela Roza Lechowicz te chu an thi bawk.

Pilot Eric Swaffer hi kum 20 chuang pilot hna lo thawk tawh a ni a, tawnhriat a ngah hle. A ṭhianpa Lucie Morris-Marr chuan, "Thlawhtheihna lamah chuan tawnhriat ngah tak a ni a, ven rual loh chhiatnain a tawng ta a ni ber," tiin a ṭhianpa chuan an himna turin theihtawp a chhuah ngei a rin thu a sawi.

Swaffer-a bialnu, helicopter-a chuang zinga mi Izabela Roza Lechowicz hi flight instructor a ni a, a bialpa nen an thi ta a ni. Helicopter-a chuang zinga mi Kaveporn Punpare hi Vichai Srivaddhanaprabha thachhang dawltu a ni a, Nursara Suknamai hi Miss Universe Thailand 2005 lo ni tawh niin Vichai-a staff zinga mi a ni.