Player mittui a sur

Club neitupa ber a awm ta lo a, Leicester player-te an in sum zo lo. Goalkeeper Kasper Schmeichel chuan, "He football club leh khawpui tana i hlutna hi thuin sawichhuah theih a ni lo," tiin a boss a thlah a, hruaitu ṭha leh Pa nih tling a nih thu a sawi tel bawk.

Leicester defender ṭhangduang Harry Maguire chuan, "Hrehawm ka tih dan hi thuin ka sawifiah zo kher lo ang. Leicester mai ni lo, World Cup ka khelh chhung zawnga min ṭawiawmna te kha ka hre reng a ni," a ti.

Foxes left back Ben Chilwell chuan, "Mi zawng zawngin an ngainat tur chi a ni," tiin a pu hlui a thlah a, a tana hlawhtlinna sual chhuak tura theihtawp an chhuah tur thu a sawi.

Leicester-in Premier League nomawi an chawi nana striker pawimawh Jamie Vardy chuan, "Engtinnge thuin ka sawifiah ang? Kei leh ka chhungte leh he club tana i hnathawh zawng zawng ka hre reng a, ka ngai dawn takzet che a ni. Chawl hahdam ang che," a ti.

Hetihlai hian club langsar tak tak Liverpool, Paris Saint-Germain, Inter Milan, West Ham United, Tottenham Hotspur, Nottingham Forest leh Swansea City-te chuan Vichai sunna thu an tarlang.