Blues chak zanah Gunners chak zo lo

Europa League khel chau pahnih Chelsea leh Arsenal ten Pathianni zan khan Premier League an khel zui a, kualmualah Blues hian Burnley 4-0 ngawta an sawp laiin; Gunners erawh an mikhualna ramah Crystal Palace nen 2-2 in an inhnehtawk thung.

Maurizio Sarri nau ten point 24 hmuin pahnihna an ni a, hmahruaitu Liverpool an phak lohna chu point hnih a ni. Unai Emery enkawl Arsenal-in point 22 neiin palina an ni - nizan khan Manchester City leh Tottenham an inkhel a, an result a zirin an dinhmun a la danglam thei.

Hazard tel lo

Season kal laia Chelsea player ṭha leh hmuhnawm ber chu Eden Hazard a ni. Belgium international hian a hnungzâng na vangin Burnley a hmachhawn thei lo. Hazard awm lo mah se Blues hian Ross Barkley an neih avangin buaina an tawk lo.

England midfielder hian minute 22-naah striker Alvaro Morata-a'n goal a khung theih nan through ball ṭha tak a pe a, chawlhlawk hnuah yard 25

aṭangin Burnley keeper Joe Hart dan theih lohin a khung bawk.

Everton player hlui hian a duhtawk mai lo, Brazil interna-tional Willian tan a siamsak a, tawp khar nan Europa League-a hat trick siam hlim Ruben Loftus-Cheek chuan an chak nemnghehna a khung ve bawk a ni.

Barkley an fak

Inkhelh banah Chelsea manager Maurizio Sarri chuan a midfielder Ross Barkley chu 'player puitling' tiin a fak a, January thlaa pound maktaduai 15 senga an lakluh hian Antonio Conte hnuaiah match li bak khel lo mah se Sarri a rawn lan chinah erawh a danglam ta hle.

Kum 24 mi hian league-ah a zawnin match thum goal a khung thei a, 2013 February thla a Frank Lampard-a'n hetiang a tih hnuah English player zinga ti leh thei hmasa ber niin ram tana khel turin koh a ni leh tawh bawk.

Italian manager Sarri chuan, "Barkley hian hma a sawn hle, goal venhim leh nawr kawngah nasa takin hma a sawn. Season hmasa kha chu a tan a harsa ang tih a chiang, tunah chuan a taksa pawh a chak tawh hle. Player ṭha puitling tak a ni tawh," tiin a sawi.

Gunners an chelh

A zawna match 11 chhung hnehna chang tawh Arsenal chu Crystal Palace mualah an chak zo lo. Palace captain Luka Milivojevic-a penalty chhuih luh chu Granit Xhaka-a'n freekick aṭangin a sut bakah Emerick Aubameyang-a'n hmahruaina goal a khung bawk. Mahse, hun tawp dawnah Milivojevic bawkin penalty aṭangin a sut.

Shkodran Mustafi-a'n goal bul hnai takah Cheikhou Kouyate a tih tluk avangin penalty a chawi a, Germany internatonal hian a hmain box chhungah hlauhawm taka a chet tawh bawk avangin a fimkhur a ngai. Minute sarih chauh a awm tawh tihah left back atana hman Xhaka-a'n box chhungah Wilfried Zaha a ti tlu bawk.

Emery naute hian tun season chhungin league match bikah chawlh lawk hmain hmahruai an la nei ngai lo a, Selhurst Park-ah pawh thil a danglam chuang lo. Goal 24 an khung tawh zinga 18 hi second half-a an khung a ni - chak zo lo mah se tlawm loa an kaltluang hi chanchin ṭha a ni.

Fimkhur a ngai

Arsenal manager Unai Emery chuan, "Kan inhnehtawk avangin ka lawm lo, chutih rualin kan thawhrimna erawh a chhuanawm hle. Hnehna chan ngei ka duh a, mahse minute 90 chhung kan inkhel kan en let chuan point insem hi a awm hle a ni.

"Match khata penalty vawi hnih chawi chu a tam, kan tlarhnungten kan box chhungah goal venhim hna an thawk nasa a, tawlh hma a ngai tih kan zir chhuak. Xhaka kha tlarhnungah a khelh a ngai, a ṭhatna ber chu midfield laiah zawk a ni," a ti. Nacho Monreal leh Sead Kolasinac te an inhliam avangin Swiss international Xhaka hi Europa League-ah pawh defender atan hman a ni tawh bawk.

Gunners hian tun hnai ni sarih chhungin match thum an khel a, Nilaini zan hian Emirates Stadium-ah Derby County nen Carabao Cup an khel leh dawn. November 3 hian Liverpool nen an inkhelh zui leh dawn avangin Championship club lakah chuan player naupang zawk chhawr a ngeiin a rinawm.