A chung berah Pep-a City

Premier League champion lai Manchester City chuan Tottenham hnehin hmahruaitu an nih chhunzawm leh ta. Thawhṭanni zan EPL inkhel pakhat awmah Man City hian Riyad Mahrez-a goal khat hmangin Spurs 1-0 in an hneh a, league match 10 khelh tawhah chak loh an la nei lo. Liverpool nen point 26 neiin goal difference nei ṭha zawk City an chungnung.

Wembley Stadium-ah inkhel ṭan hmain Leicester City neitu Vichai Srivaddhanaprabha leh a thawhpui helicopter chesuala thite sunna hun hman a ni a, Foxes forward hlui Mahrez chuan a goal khung chu a pu hlui tan hian a hlan bawk. Inrinni zana Leicester leh West Ham inkhelh zawh khan King Power Stadium bulah helicopter hi a tla a ni.

NFL Game!
Pathianni zan khan Wembley Stadium-ah NFL Game khelh a ni a, Philadelphia Eagles leh Jacksonville Jaguars te inkhelh vang hian khelmualah line rin a tam a, player tharum ngah leh pumraw lian tak tak chetna a nih avangin phul a chulin a mam tawk lo hle bawk - hemi piah lamah Thawhṭanni zanah an inkhelh phah bawk a ni.

Pep Guardiola-a'n khelmuala phul chungchung sawisel a sawt loh thu a sawi lawk a, hnehna chan phu khawpin an khel chhuak bawk. Midfielder David Silva leh Raheem Sterling te chu inkhel khaidingtu niin, an hun ṭha neih erawh an hlah. Spurs keeper Hugo Lloris chuan Sergio Aguero khung tur ṭha zetin vawi hnih a dang bawk.

Tottenham striker Harry Kane-a'n box pawn aṭangin kawh zetin a pet phei a, City keeper Ederson tan dan theih ni lo mah se bar chungah a thlawk liam. Hun tawp dawnah an siphurh sut theihna hun ṭha an nei bawk, hliam dam hlim Dele Alli hnen aṭanga a ball hmuh chu winger Erik Lamela-a'n goal ruakah a khung ṭhelh!

Mahrez-a goal
Inkhel ṭan tirah Man City an hlauhawm, minute rukna lekah Sterling chuan box chhungah ball la lutin England tana a khelhpui Trippier chu chiang zetin a bum a, a laiah cross zuiin Spurs defender pathum kara rawn dawk chhuak Mahrez-a'n rang zetin a khung.

Man City player manto ber Mahrez hian a goal khung lawm nan chunglamah a ban a phar a, tun dinhmun a thlen theih nana mi pawimawh zinga pakhat Vichai Srivaddhanaprabha a theihnghilh lo. Algerian international chuan, "Ka tan chuan hun harsa tak a ni, ani kha ka tan a hluin mi ṭha tak a ni.

"Kum li leh a chanve chhung kan inchelhchih hman a, hriatreng tur pawh ka ngah hle. A thi hi chanchin lungchhiat thlak bik a ni a, kei leh Leicester City tan kan thil ṭha tam tak a ti. Kha vang khan goal ka khung chiah khan chung lamah ban pharin a tan ka hlan," a ti a, football tana mi inpe tak mai an chan chu a ui thu a sawi tel bawk.

Poch a lawm lo
A naute khelh danah Tottenham manager Mauricio Pochettino-a'n sawisel tur a nei hran lo a, chutihrualin an khelmual White Hart Lane an hmang thei har lutuk chu hrehawm a tih thu a sawi chhuak ta.

Poch chuan, "Tun hnai kum nga chhunga ka rilru hnual ber ṭum a ni hial ang," a ti. Spurs hian stadium thar sakṭhat vangin player lei nan sum an hmang rih lo, nipui bazarah lak belh an nei lo. Champions League-a an tlawm hnuah league-ah an chak lo zui leh a, hun harsa an hmachhawn dawn niin a lang.

Tottenham hian an player neih ṭhat sa an chelh thei a, chutih rualin tun hnaiah midfielder pawimawh Christian Eriksen leh Alli te chu hliam vangin an chhawr thei lo, anni hi dam tawh mahse City lakah bench aṭanga luhtir an la ngai, an dam ṭha a nih chuan boruak thlak danglam thei tur an ni ang.

Khelmual bawk
England-a khelmual hmingthang ber Wembley Stadium-ah mipui ṭhutna a tam a, Man City nen inkhel pawimawh an neih ṭumah meuh pawh fans an thawl hle. A hawhtu an nih miau avangin an 'lal lo' a, an inkhel hun sawn a nih bakah phul ṭha tawk lo chu an tuar.

Argentine manager Pochetino chuan, "Erik-a'n ball a chan dawn khan goal chiangah ka ngai, mahse replay en a nih hnuah erawh a ni ngawt lo. Ball a pet hma khan a sawt a, a hlah phah a ni. Hun harsa tak kara ka naute khelh danah ka lawm a, minute nga hnu leka goal chhuah chunga kan beih let dan kha a ṭha tawk hle," a ti.

Man City manager Pep Guardiola chuan, "A nihna takah chuan football khelh theihna tura hmun ṭha a ni lo. Khelmual harsa takah European team khawng berte zinga mi kan hneh thei a, lawm tur kan ni. Harsatna tawk Tottenham ka hriatthiam pui, hun rei lote chhungin an chinfel theih ka duhsak," tiin a sawi.

Tottenham hian Nilaini zanah Carabao Cup khel turin West Ham an tlawh zui nghal dawn a, Man City hian Fulham an mikhual thung ang.