Tu zawkin nge semifinal khelh beiseina nei dawn? Chanmari FC Vs Chawnpui FC

Mc Dowell's No. 1 Soda Mizoram Premier League Season 7-ah zanin dar 8:00 hian Chawnpui FC leh Chanmari FC te an inkhel dawn a, club pahnih hian match nga khelh tur la hmabakah point 11 ve ve hmuin pangana leh paruknaa awm a, an inkhel result hian nghawng lian tak a nei dawn.

Chawnpui FC hian Chanmari hi 3-1 a an hneh tawh avangin head to head-ah an ṭha zawk a, table-ah dah san zawk an ni a. Tun dinhmunah head to head pawimawh mah se zanin inkhela chak an awm a nih chuan point hmanga sang zawk an awm dawn tihna a ni a, semifinal luh theih nan a pawimawh ang.

Coach thar nei Chanmari

Chanmari FC-in phase 2 aṭangin coach thar an nei a, Chawngthansanga hnuaia match hnih an khelh tawhah point khat chauh la hlawh chhuak mah se an khelh dan vangin Chawnpui coach Laldinthara'n a tum châk loh thu a sawi.

Chawnpui coach Thara chuan, "Chanmari hi pumpelh theih chu ni se khelh loh kan duh zinga mi an ni. A chhan chu coach thar an nei a, an khel ṭha em em bawk a, an inkhel ka thlir hian tum an châkawm loh a ni," tiin a sawi.

Amaherawhchu Chawnpui hian Chanmari an hneh tawh a, hei vang hian inrintawkna a awm tih a lang. Thara chuan, "Chanmari lakah hnehna kan chang tawh a, chutihrualin kan hneh hnu tih vanga zuam chi an ni lo a. Hneh nawn erawh kan tum a, kan thei bawk," tiin point thum hlawhchhuah an tum thu a sawi.

Chanmari hian coach thar Chawnga hnuaiah Mizoram Police hneh loin bul an ṭan a, match hnuhnung berah Chhinga Veng an inhnehtawk a, chak hmel an la hmu lo. Chawnga chuan, "Kan chak hun a inherchhuah theih nan kan thawkrim a, hnehna chan hi kan duh tak zet zet a ni. Ka nauteah beiseina sang tak ka nei a, team chhungah phurna nasa tak a awm avangin inkhel hmuhnawm tak kan lantir thei ang," tiin Vanglaini a hrilh.

Engtin zel?

Chanmari hian an ṭhat dan ber an la hre fuh thei lo a, chutihrualian MC Malsawmzuala hma tawnga a awm hnuah an goal nawr a na zual sawt niin a lang a, tuna an mamawh ber chu goal hmaa inrintawkna neih tiin a sawi theih a, inrintawkna tih hi vanneihna tih pawhin sawi theih dan a awm bawk.

MPL-a vawi hnih champion tawh team hian winger ṭha Lalmuanzova, Vanlalbiaa Chhangte leh Laldampuia te an kawl a, tun season-a goal nga khung tawh leh Lalnunzama nei bawkin goal khung harsatna nei tur niin a lang lo. Amaherawhchu tuna an buaina chu goal khung a nih miau avangin Chawnpui lakah tlarhma lam an insiamṭhat a ṭul dawn a ni.

An khingui tur Chawnpui FC hi tun season-a defensive khel thiam ber tihin a sawi theih a, tun season-ah an khingpui vawi nga zet an draw tawh a, vawi hnih chiah an la chak loh avangin Chanmari tan point thum hlawhchhuah a harsa ang.