Electric Veng an vannei - BVT coach

Electric Vengin Mizoram Premier League an vawi khat khelhnaah result ṭha an nei nghal a, match kua an khelh tawhah point 17 hmuin semifinal khel tura rinkai zinga mi an ni tawh. Amaherawhchu, Electric Veng tan pawha veng inlenaa lo inlan tawh ṭhin Bethlehem Vengthlang coach H. Lalhlimpuia chuan, "An squad thlirin tun dinhmun thleng tur chu an ni bik lo a, an vannei a ni," tiin an khingpui tur a hlauh loh thu a sawi.

Vawiin tlai dar 3:00 hian Bethlehem Vengthlang leh Electric Veng te hi Lammualah an inkhel dawn. EFC hian hnehna an chang a nih chuan an ke pakhatin semifinal an rap tiin sawi theih tawh mah se BVT-in an hlau bik lo a, inkhel a hmuhnawm ang.

EFC an tlahniam?

Electric Vengin phase 1 aṭangin point 16 an hmu a, hetiang zat hi hmu nawn leh se chuan semifinal chu sawi loh league hmahruaitu pawh beisei ngam a ni. Mahse phase 2-ah team nihna tak tak a lang ṭan ṭhin a, Electric Veng pawhin pressure an ngah tawh avangin season ṭantirh ai chuan point hmuh an harsat tawh a tih a lang.

Phase 2 bul ṭan nan EFC-in Chhinga Veng an hneh lo nghal a, hemi zawh hian Ramhlun North nen an inhnehtawk. Chhingcows bik hi chu an intawn hmasak ṭum pawha an hneh loh a nih avangin an tlahniam a tih theih lo a, Ramhlun North erawh an hneh nawn thei lo. Vawiin tlai hian BVT lakah fiahin an awm dawn a, an inkhel result hian an hmalam hun a hril ang.

Chak a ṭul

EFC coach Vanlalsawma Colney chuan, "Tunah chuan kan duh ang hi kan lanchhuahtir a ngai tawh a, semifinal thlen kan duh tih hi zep a ṭul tawh lo. Player-te pawhin pressure a nei a nih pawhin an paltlang a ṭul tawh a, BVT kan hneh a ngai a ni," tiin chak a ṭul tawh thu a sawi.

An khingpui chungchang sawiin Sawma chuan, "BVT hi team chhia han tih tur chu an niin kan hre lo. An inkhelhna hi thlir ila, an vanduai ṭhin a ni," tiin fimkhur a ṭul tawh thu a sawi.

Electric Veng tan inhliam vanga match hnuhnung ber khel thei lo David Lalchhuan-awma chu la dam chiang lo mah se mamawh dan a zira chhawr theih a nih tawh avangin team an phur phah khawp ang.

BVT an zam lo

Bethlehem Vengthlang coach Hlima chuan, "Kan team dinhmun a ṭha lo nachungin phurna a la awm a, chan tur chuang kan neih tawh loh avangin hlauh tur kan nei lo. Huaisen takin chak tumin Electric Veng hi kan hmachhawn dawn a, kan chak thei tih kan hria," tiin Vanglaini a hrilh.

BVT hian match hnuhnung bera hrem vanga khel thei lo defender ṭha Jonathan H. Lalhriatkima an chhawr leh thei dawn a, kim thlapa an khelh dawn avangin Electric Veng buk a rit zawkna a awm lo.

1 Chhinga Veng FC 9 7 2 0 11 3 8 23
2 Aizawl FC 10 5 4 1 20 9 11 19
3 Electric Veng FC 9 5 2 2 13 9 4 17
4 Mizoram Police 9 4 0 5 12 10 2 12
5 Chawnpui FC 9 2 5 2 10 10 0 11
6 Chanmari FC 9 3 2 4 9 12 -3 11
7 Ramhlun North 10 1 3 6 10 23 -13 6
8 Bethlehem VT 9 0 2 7 8 17 -9 2