Curry khumtu Klay Thompson

Golden State Warriors player Klay Thompson chu basketball inelna sang ber NBA match khat chhunga three-point vawm lut hnem ber a ni. Thompson hian nimin zing khan Chicago Bulls lakah vawi 14 ngawt a vawm lut.

Kum 28 mi Thompson-a'n Bulls lakah point 52 ngawt score-in a team hi 149-124 in hnehna a chanpui. 2016 November thla khan Stephen Curry chuan New Orleans Pelicans lakah three-points vawi 13 ngawt lutin record a lo siam tawh a, tunah chuan a teammate Thompson-a'n a rawn khum chiah.

Record thar siamthu Thompson chuan, "Ka tan chuan hun chhinchhiah tlak tak a ni, hetiang dinhmun thleng thei tura teammate ka nei ṭha hi ka vannei hle. NBA a nih tawh chuan thil a awlsam ngai lo, tun thleng hian a chang chuan ka la hlauthawng deuh ṭhin," tiin a sawi.

American basketball star Thompson hian a bul a ṭan fuh hle a, quarter hmasa berah chauh pawh point 22 ngawt score nghalin a club hi 44-28 in hma a hruai pui. Chawlhlawk a thlen meuh chuan Golden State 92-50 a sang falin an chungnung hle.

Thompson-a'n match khat chhung bik atan Curry-a record a khum a, season ang chuan a la hlat deuh hle. 2015-16 season khan Curry hian three-points hi vawi 402 ngawt a vawm lut a, he record hi khum thei an la awm lo.