Cricket-ah Mizo rawlthar rual an chak

Test cricket hmanga inel­na Vijay Merchant Trophy Under-16 a an match hnihnaah Mizoramin hnehna an chang a, kum 16 hnuailam Mizo rawl­­thar rual hian Arunachal Pradesh chu wicket ngain an hneh.

Arunachal Pradesh hi bat hmasain first innings-ah run 192 siamin an out vek a, over 71.3 thleng an bat - Mizoram tan Priyansh chuan wicket nga lain run 42 chiah a pe a, Sahil chuan wicket thum la vein a pui ṭha viau bawk.

Mizoramin first innings-ah run 209 tlinin over 89-ah an out vek a, run 59 siamtu Jung chu run siam hnem ber a ni. Second innings-ah thil a danglam tam lo.

Arunachal hian over 61.1 chiah an daih a, an vaia out vekin run 151 chiah an tlin. Mizoram tan captain Sahil chuan wicket ruk ngawt a la. Mizoramin over 48-ah run 135 siama Arunachal umphain wicket nga an hloh a, wicket ngain hnehna an chang ta a ni.

Mizoram hian an match hmasa berah Megahalaya an ngam lo tawh a, Arunachal lakah insiamṭhain November 2-ah Nagaland nen an in­tawng leh ang.

Result khaikhawmna
1st Innings
Arunachal Pradesh 192/10 (71.3)
Mizoram 209/10 (83)
2nd Innings
Arunachal Pradesh 151/10 (61.1)
Mizoram 135/5 (48)
*Wicket ngain Mizoram an chak