Tai Tzu Ying hi hneh theih a ni - Gopi Chand

Tun hnaiah India nula ten world number 1 Tai Tzu Ying an hneh thei lo hle a, India coach Pullela Gopichand chuan Chinese Taipei nula hi player dang ang bawka hneh theih a nih thu a sawi chhuak.

India badminton player zinga Olympic medal la thei hmasa ber Saina Nehwal-i'n Tazi Tzu Ying hi a zawnin match 12 chhung ngawt a ngam lo, London Olympics bronze medalist tan 'anchhia' ang maia hlauhawm a ni mek.

Kum 44 mi Gopichand chuan, "Tai hi player ṭha chungchuang bik a nih zia chu inhrilh nawn kher a ngai lo, a chet ranna leh finna hi a khingpui ten an chelh lo ṭhin, hei bakah hian a huaisen bawk," tiin a dahsang hle.

Player a nih laia All England title la tawh Gopi chuan sawi zawmin, "Tai hian dinhmun harsa zawka din tawh hnua thawh chhuah dan a thiam tih pawh kan hre tel, chutihrual chuan hneh theih a ni. A bik takin Indian shuttler tan hneh theihna kawng a awmin ka hria.

"Ani hneh tur hian Saina leh Sindhu ten theihna an nei sang tawk a, an mamawh belh chu huaisenna leh inrintawkna a ni. Inelna kan hmachhawn dawn hian duhthusamin inbuatsaihna nei ṭha ṭhin ila, tun aiin kan thleng sang thei zawkin a rinawm bawk," a ti.