Icardi leh Inter an kal zel

Mauro Icardi goal hnih hmangin Inter Milan chuan Lazio 3-0 in an sawp a, Luciano Spalletti naute hian Serie A match 10 an khelh aṭanga point 22 hmuin table-ah pahnihna an ni - an chungah hian champion lai Juventus (28 points) chiah an awm.

Thawhṭanni zan khan inkhelh hmain Inter leh Lazio te hi point khat chauhin an inthlau a, season hmasa khan an match hnuhnung berah intawngin Inter Milan hian 3-2 a hnehna changin Champions League an khelh theih phah. Season kal laiah pawh an boruak a intiat tawk a, an intawnna hi Lazio khelmual a nih bawk avangin Inter hi rinkai an ni bik lo.

Goal thum

Stadio Olimpico-ah hliam vangin Lucas Leiva leh Riza Durmisi te an inlan thei lo a, Milan Badelj erawh a bul ṭantu zingah a tel leh thei tawh. Felipe Caicedo leh Ciro Immobile te an inkawp theih bawk avangin Lazio lam an phur.

Hetihlai hian Nerazzurri lamin Radja Nainggolan an chhawr thei lo a, a hmun ruak luah turin Joao Mario a awm thung. Mario hi January thla khan Fiorentina nen an inkhelh ṭumin a inlan a, chumi hnuah West Ham tan loan hmangin a khel - tunah Inter tan a inlan ve leh chiah.

Mikhual Inter lamin inkhel thununin an hlauhawm zawk a, Ivan Perisic leh Matias Vecino ten ball an inpek kual hnuah Icardi chu a hmawr bawktu a ni. Chawlhlawk hman hmain Marcelo Brozovic-a'n yard 25-a hla aṭangin a khung bakah Argentine forward bawkin an goal thumna a khung.

Nerazzurri hian an intawn hnuhnung vawi ngaah ṭum li hnehna an chang ta a, vawi khat dang hi an inhnehtawk thung. May thlaa league match pawimawh lutuk an khelh ṭuma hun tawp dawna goal khungtu Matias Vecino chu Inter tan player pawimawh a la ni reng a, tun ṭumah pawh midfield khaikhawmtu pawimawh a ni.

Inter an lawm

Season hmasa tir lamah Inter Milan an kal fal a, champion tura rinkai zingah an tel phak. Mahse, season laihawlah an talbuai avangin an zuih ta hle. Inter manager Luciano Spalletti chuan, "Kan khelh dan kha duhthusam a ni, inkhel thunun chungin hnehna kan chang. Lazio khan kan tan harsatna liantham an siam meuh lo," a ti.

Italian manager chuan sawi zawmin, "Tunah hian Juve ang kan ni tihna erawh a la ni lo, chutihrualin kan ban phak loha awm an ni bik lo tih erawh hriat tel a ngai. Season hmasa lama kan buaina tawh ang khan season laihawlah kan tawh loh ngei ka beisei," tiin a sawi.

Goal hnih khungtu Inter Milan captain Icardi chuan, "Barcelona nen angkhat kan la nih loh thu ka sawi tawh a, tunah chuan dinhmun ṭha luah thei kan nih thu sawi hun a ni ve ta. Inter hi ka chamchilh rei tawh a, tun ang hian game ṭha tak khela kaltluan hi kan ngah lo," a ti. A zawnin Seie A match ruk chhung hnehna an chang tawh a ni.