Aizawl FC-in Ramhlun North an sawp

Mc Dowell's No.1 Soda Mizoram Premier League Season 7-ah Aizawl FC chuan nimin tlai khan Ramhlun North 4-0 in an sawp.

Gift Raikhan hote hian I League match hmasa bera Shillong Lajong an hneh loh avangin tuna hnehna an chan hi intuaithar nan an mamawh a, tualchhung football vanga rilru kamtu nei loin kartawpah Mohun Bagan an hmachhawn thei ang.

Inkhel chu

First half-ah chungnung zawk an awm lo a, an goal nawr a nat loh avangin inkhel hmuhnawm tak a ni lo.

AFC forward Lalkhawpui-mawia'n a chakna hmangin chance ṭha insiam mah se keeper Eddie Zorammawia'n a dan sak.

Ramhlun North pawhin goal chance an insiam tho a, Lalremruata goal khung chu offside vangin pawm a ni lo.

Amaherawhchu minute 31-naah Albert Zohmingmawia'n box sir aṭangin goal kilah a pet lut a, I League club dinhmun a ṭha nghal bawk.

Second half-ah Albert bawk che ṭhain a cross ball ṭha zet chu Rochharzela'n hnai tak aṭangin a khung. Ramhlun North vanneih ni a ni lo a, K. Lalnunzama ball petin goal ban a per a, goal chhungah a kal lo.

Minute 54-naah Lalhriatrenga zawnah ball tla fuhin AFC defender hian a hun ṭha neih chu goal-ah a chantir. I League club an chungnung zui a, Lalkhawpuimawia'n a penalty hlawhchhuah a khung thei lo a, Kelkang tlangval hian goal khung theihna hun ṭha dang a hlah leh bawk.

Hun tawp hma minute riat chiah a awm tawh tihin Lalruatfela Zote chuan a hun ṭha neih chu goal-ah a chantir a, he goal pawh hi man of the match atana thlan Albert-a siam bawk a ni.

Eng nge a nghawng?

Ramhlun North-in match 10 khelhah point ruk chauh an hmuh avangin semifinal beisei ngam chi a ni tawh lo a, relegation playoff pumpelh chu an tum ber a ni tawh ang.

Aizawl FC erawh point 19 an hmuh tak avangin semifinal an khelh theih ngei a rinawm a, MPL-ah player ṭha ṭhenkhat hahchawlh tirin I League-ah an insawrbing thei ang.