Real boss Lopetegui hun a tawp ta

European champion Real Madrid chuan an beisei ang result an neih theih loh hnuah coach Julen Lopetegui an ban ta a, a hmun ruakah hian Real Madrid B team boss Santiago Solari chu ruat lailawk a ni.

Champions League-a season thum chhung a zawna champion thei Real Madrid hi La Liga-ah pakuana an ni mek a, 2001-02 hnua season bul an ṭan chhiat ber ṭum an tawng mek - a tawpah coach-in a tuar ta.

Thawhṭanni zing thleng kha chuan Lopetegui hian Real Madrid team chu training a la neihpui a, mahse hemi ni veka board meeting chuan ban tura thutlukna an siam tak avangin Thawhṭanni zanlaiah khan Spanish coach banna thu hi an ti chhuak ta a ni.

Lopetegui hian Pathianni zan khan an hmelma kumhlun Barcelona lakah Real chu 5-1 in a mualpho pui a, El Clasico-a a tlawmna hi a 'tawpna' tur nia rin lawk theih sa a ni tawh - tun hnai an match rukah vawi nga an tlawmna a ni.

Mangṭha Julen...

Kum 52 mi manager hian June thla khan Real Madrid a enkawl tur thu a tichiang a, Santiago Bernabeu-ah hian kum thum cham turin contract a ziak.

Hetihlai hian Spanish coach hian Spain a enkawl lai a ni a, World Cup khelh hmabak mai an ni. Royal Spanish Football Federation chuan hei hi hre thiam loin World Cup nomawi 'chan' huamin Lopetegui an ban.

Spanish coach hi Real-in mipui hmaah an pho chhuak zui a, hnuk ulh ṭeuh chungin Spain-in an ban avanga a rilru nat thu a sawi a, "Vawiin hi ka hun tawna hlimawm ber a ni," tiin Real a enkawl thei chu a lawm thu a sawi zui.

Mahse, thla li leh a chanve a liam a, Spanish FA hma meuha na taka amah chhantu Real Madrid president Florentino Perez chu ban a nih theih nana thutlukna siamtu ber a ni ta a, World Cup hma lawka sawi 'hat' coach kha hna nei lo a ni ta.

Coach vanduai?

Real hi an match hnuhnung parukah vawi nga an tlawm a, an chak chhun pawh hi Champions League-a club tenau Viktoria Plzen an hneh chu a ni.

Plzen an hmachhawn hma hian an hneh ngei tura ngaih CSKA Moscow, Alaves leh Levante chu a zawnin an hneh lo a, Plzen laka an chak hnuah Barcelona lakah 5-1 ngawtin an mualpho.

Real-in an hmachhawn team-te enin an result hi a chhe takzet tih hai rual a ni lo a, Madrid khaw club hian, "Kan squad neih leh result a inmil lo a ni," tiin an coach an ban chhan an sawi a, Julen chhan duhtu tan erawh chhanna tur a awm tho.

Spanish club hian season riat chhung ngawt a zawna goal 40 chuang khung thei Cristiano Ronaldo an hralh a, a hmun ruak luah tur lakluh an nei lo - hemi siamrem ringawt pawh hi coach tan chuan a harsa a ni.

The 'Interim' One

Real-in an coach turin Santiago Solari an ruat lailawk thu an sawi a, Real tana khel tawh, Madrid B team lo enkawl tawhtu a nih bawk si avangin Zinedine Zidane angin Perez hian coach ngheta lakluh a tum em ni? tih chu zawhna awm a ni.

Mahse, tun dinhmun aṭanga thlir chuan Solari hi Real coach a nih hlen a rinawm lo. Zidane kha chu Real tan a khelh laia an player ropui ber pawl a ni a, Solari erawh 2000-05 chhunga Real tana match 148 a inlan kha substitute anga a inlan a tam zawk.

Perez hian Zidane kha Real enkawl tura 'chher' a duh a, 2013-14 season-ah khan coach ropui Carlo Ancelotti hnuaia inzir turin 'assistant coach' a nih tir.

B team a enkawl lai pawhin result ṭha a nei a, Solari erawh season hnih chhungin third division-ah pariatna leh 11-na bak Real B team hi a nihpui thei lo - hei zawng zawng thlirin Solari hi coach nghet a nih a rinawm lo.

Real coach tur?

Spanish FA danah coach lailawkin kar hnih bak team an enkawl thei lo. Solari hna a awlsam dawn a, hetih chhunga a hmachhawn tur hi Copa del Rey-a third division club Melilla, league-a Real Valladolid leh Celta Vigo bakah Champions League-a Viktoria Plzen hmachhawnte a ni.

Hetih chhung hian Real thuneituten thutlukna an siamfel hman a ngai dawn a, Antonio Conte chu inbiakna thui tak an neihpui hman. Mahse, Italian coach hian contract rei zawk a duh a, striker thar leh central defender thar a duh bawk.

Hei mai hi a ni lo - Conte hi coach, mahni thuduh ve tak a ni a, Real-a 'star' player rual hian a enkawlna hnuaia awm hi an duh ang em tih chu zawhna awm a ni. Real president Perez-a'n coach chungchangah player a rawn ṭhin a, Rafael Benitez a ban dawn pawh khan Ronaldo leh Sergio Ramos a rawn thlap a, Conte chungchanga Ramos chhanna chu 'Aih' tih a ni rih.

Belgium coach Roberto Martinez hming pawh lam rik a ni a, ani erawh Perez duh dan apiang pawm thei tura ngaih a ni a, Eden Hazard a thlem chhuah theih beisei a ni bawk - Joe Mourinho hming a ri tel a, Real-ah a kir thut a nih pawhin a mak lo ang.