Liverpool-in Champions League hausak pui

Champions League final-a Real Madrid ngam lotu Liverpool chuan season hmasaa inelna an hmachhawnna aṭangin sum tam tak an neih belh a, UEFA-in sum sem dan an tihchhuah thar berah Liverpool hian Champions League vang ringawt khan pound maktaduai 71.9 an hlawh.

Real Madrid chu Cham-pions League-a sum hlawh chhuak hnem ber an ni a, pound maktaduai 78.4 an hlawh a, hetah hian nomawi an chawi avanga an hlawh pound maktaduai 13.7 chu a tel.

Quarterfinal paltlang zo lo Manchester City chuan pound maktaduai 56.5 an dawng a, Chelsea-in last 16 an paltlang zo lo chungin pound maktaduai 57.6 an hlawh a, last 16-a zinkawng tawp zingah Tottenham (£54.3m) leh Manchester United (£35.7m) dawn pawh a tlem lo hle.

UEFA chuan sum sem danah hian 'market pool' tih chu a kalpui a, heta ṭanga sum sem dan hi an inkhelhna hmuna Television market leh mahni ram league-a an dinhmun a zir a ni.

Chelsea-in Champions League-a che ṭha si loa an aia thleng sang Manchester City aia sum an hmuh hnem chhan hi Premier League champion nichunga Champions League an khelh vang a ni.

Manchester United chu Spurs leh Chelsea te nen Champions League lamah an thlen chin in ang reng mah se Europa League champion avanga CL khel an nih avangin an sum dawn a tlem bik.

UEFA-in a tarlan dan chuan Champions League-a khel club-te laka an sum sem zawng zawng belhkhawm hi pound tluklehdingawn 1.25 a tling!

Champions League khelh hlawkzia chiang taka ti langtu pakhat chu Europa League khel te nena an sum dawn inthlau lutuk hi a ni - Europa finalist Marseille chuan pound maktaduai 20.3 an dawng pha ṭawk a, champion ta Atletico Madrid chuan pound maktaduai 14.3 an dawng hram.

Mahse, Atletico hian Champions League an khelh hmasak avangin group stage khelh manah pound maktaduai 28 an hlawh hman tho a, Arsenal chuan Europa League semifinal an thlen avangin pound maktaduai 33.4 an dawng.

Europa League-a sum sen zat hi a vaiin pound maktaduai 379 a ni a, Champions League-a sum sen zat 30% chauh a ni.