Leicester-ah mittui a hul thei lo

Helicopter chesual avanga nunna chan ta, Leicester City neitu Vichai Srivaddhanaprabha vangin Leicester khawpuiah mittui a la hul thei lo a, nimin khan a nupui Aimon leh a fapa Aiyawatt Srivaddhanaprabha te chuan King Power Stadium-ah an pa hriatreng nan pangpar an dah.

Leicester chairman nupui Aimon leh an fapa Aiyawatt-te hi Thailand FA president Somyot Poompanmoungleh a nupui Potjaman Poompanmoung ten an ṭawiawm a, Foxes manager Claude Puel leh player-te an tel bawk.

Leicester neitute chhungkua hian pangpar an dah hma hian stadium chhungah player-te chu an hmu a, a hnuah an pa hriatreng nan pangpar an dah zui a ni.

Khawvel hriata Leicester pho chhuaktu Vichai uina thu football khawvel leh pawn lam aṭangin hriat tur a la awm reng a, Foxes neitupa thihnain nghawng a la nei zel.

Leicester City legend Gary Lineker: Kan club tluchhe mai tur a chhan chhuak a, khawvel hriatah a pho chhuak a ni.
Premier League-a Leicester champion puitu Claudio Ranieri: Dressing room a rawn luhin thurawn min pe turin a rawn lut ngai lo a, min chibai turin a rawn kal mai ṭhin. Pa ngainatawm tak a ni a, a kutthlak tawhna thil chuan ṭhat lam an pan zel ṭhin.
Leicester captain Wes Morgan: Kan chariman chunga thil thleng hian min
ṭhawngin a na ka ti takzet a ni. Leicester FC-a mi zawng zawngin ani hi chu an ngainain an hmangaih a ni.
Prince William: Football tana hna ropui tak thawktu a ni a, khawvel hriatah Leicester City chu a pho chhuak a ni.
Britain Prime Minister Theresa May: Vawiina sunna zozai hian nunna chanta ten midang chunga ṭhatna an lo lantir tawh kha a hrilhfiah a ni.
Jose Ragoobeer: Leicester City tan mai ni lo, Leicester khawpui tana engkim petu a ni.
*Josh hian February khan an chenna ina kangmei chhuak avangin a nupui leh a fate pahnih a chan a, hemi ṭum hian Vichai chuan King Power Stadium chu a chhungte vui nan a hman tir a ni.