FA Cup: Chelsea leh Liverpool an inlan dawn
English football-a inelna ngaihhlut hlawh tak FA Cup fifth round chu zaninah khelh chhunzawm a ni dawn a, League Cup final khel zo hlim Chelsea leh Liverpool pawh an inlan dawn.
Chelsea hian zanin dar 12:45-ah Luton Town an lenchilh dawn a, an hmachhawn tur hi Championship club mah ni se, Premier League khelh beisei ngam zinga tel phak an ni a, a awlsam lo ang.
Liverpool-in zanin dar 1:45-ah Premier League club Norwich City an mikhual dawn a, champion hlim, Anfield-a inkhel tur an ni a, Reds lenchilh hi Norwich tan a châkawm lo.
Zanin dar 1:00-a Premier League club pahnih, Southampton leh West Ham inkhel tur hi club lian angin ngaihven hlawh lo mah se a hmuhnawm dawn tih a chiang.
Insiamṭhat hun
Chelsea tan Premier League nomawi beisei turin thilmak a ngai tawh a, League Cup final-ah an tlawm a, FA Cup leh Champions League chu nomawi liantham an beisei theih a ni ta - Thomas Tuchel tan ngaihthah a thiang lo.
Blues player-ten Liverpool an ngam lohna boruak duhawm lo thaireh nan chak an duh dawn a, Malang Sarr, Timo Werner leh Romelu Lukaku ten inrintawkna neih let nan bul an ṭan a nih pawhin a mak lo ang.
Liverpool lakah hliam vangin Cesar Azpilicueta lakchhuah a ngai a, Blues captain hi Tuchel-a'n zaninah a inlan tir nghal a rinawm chiah lo. Hetihlai hian hliam tenau nei Hakim Ziyech erawh dam hman tura ngaih a ni.
Spanish midfielder Saúl Ñíguez tan hmun a awm tura ngaih a ni a, FA Cup-ah Edouard Mendy a la inlan miah loh avangin Reds laka hmingchhia Kepa Arrizabalaga hian si ban a nghak ang em, tih chu zawhna a ni - Luton hian tun season-a goal 13 khung tawh Elijah Adebayo an kawl.
Reds hmabak awlsam?
Norwich boss Dean Smith chuan, "FA Cup hi khawvela cup inelna upa ber a ni a, kan ngaihlu hle. Anfield-ah pawh hnehna chan ngei tumin kan lenglut dawn a, mahse, Premier League kan ngaihtuah a ṭul.
"Inrinniah game pawimawh tak neiin Brentford kan tum dawn a ni," a ti a, English top flight league-a inhamtan an ngaih pawimawh ber thu a sawi - an ṭhat dan ber pawha Reds nena inthlau team hi team nem zawk nen Anfield-ah an chak a rinawm loh.
Premier League champion tum Liverpool-in League Cup final-ah minute 120 ngawt an khelh avangin an chau ang tih a chiang a, Inrinni zan dar 11:00-ah league match khel turin West Ham an mikhual zui dawn.
Hetiang boruak karah Jurgen Klopp-a'n a neih ṭhat ber a thawhchhuahpui lo ang tih a chiang a, Divock Origi, Takumi Minamino, Konstantinos Tsimikas leh Harvey Elliott te hoin hun ṭha an neih a rinawm - hriat tel tur erawh Klopp-a'n Liverpool coach a nih hnuah FA Cup nomawi chiah a la chawi lo a, inelna a ngai thutak dawn.
FA Cup - Fifth Round
Nizan Inkhel (Result kan hre hman lo)
Peterborough United 12:45 AM Manchester City
Crystal Palace 1:00 AM Stoke City
Middlesbrough 1:25 AM Tottenham Hotspur
Zanin Inkhel Tur
Luton Town 12:45 AM Chelsea
Southampton 1:00 AM West Ham United
Liverpool 1:45 AM Norwich City
March 3, Ningani zan
Everton 1:45 AM Boreham Wood
March 7, Thawhṭanni zan
Nottingham Forest 1:00 AM Huddersfield Town