Blasters vs Mumbai Semifinal hmun inchuh

Indian Super League-in a boruak vawrtawp a tawng chho mek a, zanin dar 7:30 hian match hnih chiah khelh tur awm tawha semifinal beisei ve ve, Kerala Blasters leh Mumbai City an intawng dawn.

K. Lalṭhathanga (Puitea) khelhna Blasters tan zanin inkhel tur hi thih leh dam kar a ni tawh - zaninah Mumbai club an ngam lo a nih chuan semifinal beiseina a bo tawh dawn a, an draw pawhin match tawp bera Mumbai result-ah an innghah tel a ṭul dawn.

Lalengmawia (Apuia) leh Lallianzuala Chhangte khelhna Mumbai City tan tlawm a thiang bik lo a, Manchester City nena inzawm club hi an tlawm chuan match tawp bera Blasters result-ah an innghah tel a ṭul ve dawn bawk.

A tawi zawnga sawi chuan, zanina tlawm tan semifinal beiseina a bo dawn, a tih theih a, zanin inkhel boruak a 'hot' loh ring suh.

ISL-ah Hyderabad chu semifinal khel chiang tawh an ni a, nizan khan semifinal khel tura match thuma point khat chiah mamawh Jamshedpur nen an inkhel a, result kan hre hman lo.

Top five zinga mi ATK Mohun Bagan chuan match hnih an la neih aṭanga semifinal khel turin point khat chiah an mamawh ve bawk a, hmun ruak pakhat chu Blasters leh Mumbai ten an inchuh tiin a sawi theih.

Bethlehem Vengthlang tlangval Puitea chuan, "Kan match hnuhnung berah 3-0 a Chennaiyin kan hneh avangin team boruak pawh a ṭha a, chak ngei pawh kan tum. Kan tlawm chuan semifinal beiseina a tawp dawn tih kan hria a, theihtawp kan chhuah ang. Keimah pawh ka ṭha a, tun dinhmunah chuan harsatna ka nei lo," tiin Vanglaini a hrilh.