Vanglaini Biangbiakna ; Keima thiam loh a ni - Khalid Jamil

Mizo tlangval Joe Zoherliana'n Indian Super League-a NorthEast United match hnuhnung berah hero of the match chawimawina a dawng a, a team erawh hnehna a chanpui zo lo.

Highlander hian Thawhṭanni zan khan East Bengal chu 1-1 in an inhnehtawkpui a, NorthEast tan Marco Sahanek chuan first half hun pek belhah goal hmahruai a khung a, mahse, Kolkata club tan Antonio Perosevic chuan penalty hmangin a chhanglet.

NorthEast United-in match 20-a point 14 lek hmu chungin season an khar a, East Bengal-in point 11 neiin Highlander aiin match khatin an khel tlem a, mahse, an intawn hmasakah Kolkata club hi an lo tlawm tawh avangin Highlander aiin an sang thei tawh lo.

Team pahnih inkhelh zawhah Vanglaini chuan NorthEast United coach Khalid Jamil biangbiakna a nei a, Aizawl FC boss hlui chuan, "Keima thiam loh a ni," tiin an result chhiat chhanah mawhphurhna a la.

Zalen lo val!
Khalid Jamil chuan, "Season ṭan hmain club neitu John Abraham leh a nupui Priya Runchal nen kan inbia a, nomawi chawi an duh thu min hrilh. Mahse, an beisei ka phak lo a, coach ka nihna angin ka thiam loh a ni tih ka pawm," a ti.

Mahse, Indian coach boruak ngah ve tak hian tun hnaiah Highlander-a thuneihna pumhlum a neih loh thu a sawi a, match ruk vel an khelh hnuah club technical director Ohad Efrat a inrawlh nasat thu a sawi.

Khalid chuan, "Technical director a awm hnuah thutlukna chu ka kut a ni lo zui a, thuneitu lam aṭanga a thu zawm tura tih ka nih avangin ka zalen lo a, a ruahmanna anga ka kal zel a ngai a ni," a ti a, zalen taka hna a thawh loh thu a sawi.

Crystal Palace academy-a analyst hlui Efrat hian season hmasa khan NorthEast hi a zawm a, tun season-ah erawh January-ah a rawn kir. Khalid chuan, "TD inrawlh loin, zalen takin hna thawk ila, result a danglam ang em, ka sawi thei lo. Mahse, zalen taka hnathawh erawh a danglam a ni," a ti a, a ṭawngkamah Efrat a ngaisang lo tih a lang.

Mizo chunga lawmna
Khalid-a'n Highlander-ah Mizo player a ngah a, midfielder Emanuel Lalchhanchhuaha, defender Joe Zoherliana, forward R. Laldanmawia, striker Lalkhawpuimawia (Mapuia), forward Rochharzela leh striker William Lalnunfela te a nei.

Hliam vangin Emanuel-a a inlan miah lo a, season laihawlah Chhara a inhliam a, Joe leh Danmawia ten season duhawm an hmang a, Mapuia leh William erawh khelmualah hun an hmang tam tawk lo.

Khalid chuan, "Mizo player-te khelh danah ka lawm a, an vai hian ka hriatchian sa an nih avanga lalut pawh ka ni a, a bik takin Danmawia hi ka player neih ṭhat ber zinga mi a ni reng ṭhin.

"Highlander ka enkawl ṭantirh aṭang khan tum ka nei a, chu chu hmarchhak football team a nih ang ngeia hmarchhak team a nihna lantir a ni. Mizoram mai ni lo, Manipur leh Assam aṭang pawhin player ka lalut a, anni nen hian thil ropui tak din kan tum a ni," a ti.

Cham rih la
ISL-a Indian coach nghet hmasa ber Khalid-a'n Highlander-a cham turin kum khat dang contract a la nei a, Mumbai tlangval chuan, "NorthEast hi nuam ka ti a, kum khat contract ka la neih avangin cham ngei pawh ka duh.

"Management lam pawhin ka chungah rinna an nghat a, kan thawh ho zel ka ring," tiin ISL-ah coach a nih chhunzawm tur thu a sawi a, club neitu Bollywood star John-te nupain an thlawp thu a sawi bawk.

Khalid hian vantlang hriatah an technical director Ohad Efrat a lo sawisel tawh a, Vanglaini nena inkawmnaah pawh Ohad nen buaina an neih thu a pha lo - anni pahnih hi an thawk dun zel thei ang em, tih chu zawhna a ni ta.

I League ropui vanglaia Aizawl FC champion pui theitu coach hian, "Ram pawn coach-te hi an chapoin, engkim hriaah an inngai a ni," tiin East Bengal an hmachhawn hmain a lo sawi tawh bawk a, he coach chanchin ngah tak hian Indian football-ah chanchin ngaihnawm a neih belh zel dawn e.