FIFA leh UEFA ten Russian football club leh national team an hrem

Russia-in Ukraine a run avangin FIFA leh UEFA chuan Russian football club leh national team te chu an hnuaia inlena aṭangin tiam chin awm loin an hrem.

Hremna chu
Football thuneitu sangten thutlukna rorum tak an siam avangin tun thlaa khelh tur World Cup playoff-ah Russia an tel thei dawn lo. Hmeichhe football team pawh Euro 2022 inelnaah an khel thei lo ang.

Spartak Moscow chu Europa League aṭanga paih chhuah an ni a, last 16-a Russian club khingpui tur RB Leipzig-in quarterfinal an lut ang.

UEFA pawhin anmahni sponsor-tu Russian energy giant Gazprom chu an titawp nghal.

Thutlukna hmasa
Khawvela football thuneitu sang ber FIFA chuan Russia chu Ukraine an run avangin an ram puanzar leh hnam hla hnuaia inelna hmachhawn an khap.

FIFA-in Russia hi a hrem avangin an ram chhungah international match khelh a phalsak lo a, an muala khelh tur chu neutral ground-ah entu awm loin an khelh a ngai dawn.

Russia hmingin inelna an hmachhawn thei lo a, Football Union of Russia (RFU) hmingin inelna an hmachhawn a ṭul dawn. Football Union of Russia hminga inkhelhah hian Russia flag leh hnam hla hman phalsak an ni lo bawk.

FIFA chuan IOC, UEFA leh infiamna dang pawl hrang hrangte rawn chungin thil thlen dana en zui reng tur thu a sawi bawk. Amaherawhchu Poland-in World Cup playoff-ah Russia an hmachhawn loh tur thu an puang.

Poland chauh ni loin an group-a awm Sweden leh Czech Republic te pawhin Russia hmachhawn an tum lo. England-a football thuneitu sang Football Association (FA) pawhin Russia an dem tih lantir nan hmachhawn an tum loh thu an puang.

Three Lions bakah hian Scotland, Republic of Ireland, Northern Ireland leh Wales te pawhin Russia an hmachhawn duh loh thu an puang. FIFA tan thutlukna khauh zawk siam a awl phah sawt ang.

Thutlukna Thar
FIFA-in Thawhṭanni zanah UEFA nen thuchhuah inṭawm an siam a, Russia football team leh club-te chu a hnuaia inelna hmachhanw thei lo turin an hrem thu an puang.

"Russia-in Ukraine a run chungchangah hian football lam chu kan inlungrual a, indona avanga harsatna tawk Ukraine mipuite kan hre reng a ni. FIFA leh UEFA president te chuan Ukraine-ah dinhmun ṭha a awm vat kan beisei a, inlungrualna leh zalenna kawngah football-in hmun pawimawh a chan leh ngei ka beisei a n," tiin FIFA leh UEFA ten thuchhuah inṭawm an siam.

Poland leh ram dangten FIFA thutlukna hmasaah lungawi chiah lo mah se an beisei ang thlapin thutlukna thar an siam. Hetihlai hian Russia tan erawh chanchin duhawm lo a ni thung.

Russia rama football thuneitu sang Russian Football Union (RFU) erawhin thutlukna chu pawm harsa an tih thu an sawi a, thuneitu sang zawk hnenah khing an tum.

Spartak Moscow pawhin, "Pawm thiam a har. Sport hi hun harsaa remna siamtuah kan ngai a, hrehawmna belhchhahtu tur a ni lo," tiin FIFa leh UEFA thutlukna an pawm lo.

A nghawng a lian
UEFA-in tun season Champions League final khelhna tur chu St Petersburg aṭangin Paris-ah an sawn tawh. Manchester United pawhin Russia national airline 'Aeroflot' aṭanga sponsor dawn chu an titawp.

Bundesliga club Schalke pawhin an main sponsor Gazprom nena an inremna an titawp tawh a, kar liam ta pawh khan an kawr hmaah Russian energy company logo pawh an dah bo tawh.

Tottenham manager Antonio Conte chuan, "Khawvel pum hi a lungrual tlat a ṭul. Thutlukna mawl tak laka lungawi lohna lantir hi a dik," tiin ṭanrual a ṭul thu a sawi.

Infiamna dang
International Olympic Committee (IOC) chuan an hnuaia infiamna pawl hrang hrangte chu Russian leh Belarusian infiammite hrem tura a ngen thu a sawi.

Russia-in Ukraine a run theih nan Belarus hian a pui a, hemi a nih avang hian Belarusian infiammite hrem theih dinhmuna an ding hi a mak lo.

International Paralympic Committee chu vawiin hian an inhmu khawm dawn a, British Paralympic committee chuan Russian leh Belarusian infiammite chu paih turin a ngen.

British Olympic Association leh Germany-a National Olympic Committee (NOC) te chuan Russia leh Belarus te chu khawvel huap infiamnaa paih an phut.

Formula 1-ah pawh September 25-a neih tur Russian Formula 1 Grand Prix chu kar liam ta khan an ṭhulh tawh. World Rugby pawhin Russia leh Belarus te an hrem tawh. Badminton-a thuneitu sang BWF pawhin Russia leh Belarus-a inelna neih turte a ṭhulh.

Ukraine leh Russia inkara remna leh muanna awm theih nan infiammna pawl hrang hrangin an theihna zawnah hma an la a, nghawng ṭha lam a nei dawn em tih erawh hunin a hril ang.

Thlirna Tawi: Russia-Ukraine Indona
Ukraine dinhmun
• Ukraine hi Europe khawchhak lamah a awm a, Russia nen ramri an inṭawm. Tun hmain Soviet Union-ah a tel ṭhin a, kum 1991 khan zalenna neiin an indang.
• Ukraine hi Europe-a ram lian ber dawttu a ni a, anni aia lian chu Russia chiah awm mah se ram rethei ber zinga mi a ni.
• Ukraine-ah hian mi maktaduai 40 an cheng a, Europe ram mihring bit lamah pasarihna a ni pha. An ram khawpui Kyiv-ah mi maktaduai thum an cheng.
• Ukraine khua leh tui 10 zinga pariat zelin an hnam ṭawngah Ukrainian an hmang a, 10 zinga pahnih dawnin Russian an hmang.
• Russia president Vladimir Putin thlirnaah chuan Ukraine hi Russia ram ro hlu a tling. Kum 2014 khan Russia hian Ukraine chhim lama awm Crimea an run a, tun thlengin an luah zui.

Thil thlen dan thlangpui
November 2021: Satellite thlalak aṭanga a lan danin Russia chuan Ukraine nena an ramriah an sipai an tir. Russia chuan Ukraine run tumna an neih loh thu an sawi a, NATO erawh Ukraine nena tun hma zawng aia inhnimhnaiah an puh thung.
December 2021: Russia chuan buaina chinfelna turah khawthlang lam ramten an thil duh an tihpuitlin a phut a, chung zingah chuan Ukraine-in NATO a zawm tur a ni lo, tih pawh a tel. January 17, 2022: Russian sipaiten Belarus an thleng a, Belarusian sipaite nena training nei ho tur niin an insawi. Belarusian leader Alexander Lukashenko pawhin buaina vang lam ni loin kalphung pangngai a nih thu a sawi bawk.

January 24: NATO chuan an sipaite chu koh theih maia an awm thu a sawi a, an lawng leh thlawhtheihnate thawn zel an tum. NATO secretary general Jens Stoltenberg chuan, "NATO-in an thawhpuite venhimna kawngah a theihna zawng zawng a chhuah ang," tiin a sawi. January 26: US chuan Russia thil phut an chhang a, Ukraine-in NATO a zawm lo ang tih an tiam thei lo. Russia president Putin chuan khawthlang ramte chu an ngaih pawimawh namnulah a puh.

February 15: Russia chuan Ukraine ram ṭhenawm aṭangin an sipaite an lakchhuah thu an sawi a, amaherawhchu NATO lamin Russia thusawi fiahna a awm loh thu an sawi thung. February 22: President Putin chuan Ukraine chhak lama Russia-in a thlawp, Ukraine aṭanga inla hrang ram pahnih pui turin sipai an kal thu a sawi. February 24: Putin chuan Russian sipaiten Ukraine-ah 'special military operation' an neih thu a puang. Ukraine erawhin Russian-in an run thu an puang thung.

Russia-in an run
• February 24, Ningani zing khan Russian sipaiten Ukraine ramri an lut a, khawpui lian bula sipai awmna hmunahte bomb an thlak bawk.
• Ningani zan lam leh February 25, Zirtawpni zing lamah boruak aṭangin an bei zui a, Ukraine khawpui Kyiv thlengin an vai hma vek.
• Zirtawpni zing hian Kyiv khawpui femah Russian tank hmuh a ni. Zan lamah nasa lehzualin an kap.
• Russia hian civil mi awmna thlengin an vai hma a, civil mi 350 chuang an thi tawh. United Nations chhut danin mi nuai khat chhuagin an sahimna zawngin an ram khawpui an chhuahsan.
• Lithuania, Latvia, Poland, Hungary, Slovakia, Romania leh Moldova-te chuan Ukraine aṭangin ral tlan an beisei.