Arsenal-in sum hloh hnem

Arsenal chuan 2020-21 chhunga an sum dinhmun an tarlang a, pound maktaduai 100 chuang an hloh - North London club hian season khat chhunga sum an hloh hnem ber ṭum an tawng, a chhan lian tak chu Covid-19 a ni tih a chiang.

Kum hmasa lamah chuan Gunners hian pound maktaduai 50 aia tlem an hloh. Nikumah erawh chhiah pek hnuin pound maktaduai 107.3 an hloh a, an sum hloh zinga pound maktaduai 85 chu hripui leng vanga ngaih a ni.

Gunners hian 2020-21 season season khan Emirates Stadium-ah entu awm chungin match hnih chiah an khel a, pound maktaduai 3.8 chauh a lalut. Kum hmasa lamah inkhel en man aṭangin pound maktaduai 75 an hmu a, season liam ta nen a inthlau hle.

Coaching staff leh player tam zawkten an hlawh 12.5% thlenga an tih hniam hnuah pawh hlawh atana sum chhuak chu pound maktaduai 244 a la ni phak. Ba rulhna leh a kaihhnawih - player contract tihtawpsak leh zângnadawmna pek telin sum chhuak chu pound maktaduai 117.4 a ni.

Gunners hian 2022-23 season atan ticket man chu 4%-in an ti sang dawn. Inkhel en man an tihsan tur thu an puan hma lawk hian season hmasa lama sum an hloh hnem dan hi an tarlang hmasa.

North London club chuan thuchhuah siamin, "Tumahin inkhel en man tih san hi an thlawp lo ang tih kan ring. Mahse, kan thutlukna hi an hriatthiam hram kan beisei. Hun harsa kan paltlang theih nan ruahmanna hi siam a ni," an ti.