Remna duhtu Medvedev

Tennis world number 1 Daniil Medvedev chuan remna leh muanna a duh thu a sawi a, a bik takin kum naupang zawk ten an suangtuahna ram an thlen ngei theih nan indona awm lo se a duh thu a sawi bawk.

Infiamna peng hrang hrangah Russia chu hrek an ni mek. Russia hian Ukraine a run avangin hrekna dang pawh a la tawk chho zel dawn ni pawhin a lang, tennis huangah erawh hrekna thu a la chhuak rih lo.

Kum 26 mi Medvedev chuan, "Khawvela nau-pang zawng zawngte aiawhin hei hi ka sawi a ni. Anni hian duhthusam leh suangtuahna an nei a, hmabak êng leh nghahhlehawm tak an nei, chuvangin remna leh muanna an mamawh.

"Naupang te hian khawvelah beiseina sang tak an nei, rinna leh hmangaihna an pianpui a, inthluktlanna leh himna te chu an rilrua awm tlat a ni. Chuvangin naupangte suangtuahna hi i tihtawpsak lo hram ang u," tiin remna leh muanna a tlangaupui.