Sports budget-ah USAM an lawm lo

Mizoram State Level Sports Association 32 intelkhawmna United Sports Association of Mizoram (USAM) chuan Mizoram budget 2022-23 chungchang thuchhuah an siam a, infiamna atana cheng nuai 2422.12 chauh an dah chu an hrethiam lo.

Mizoram chief minister Zoramthanga chuan kum 2022-23 atana Mizoram budget chu kar liam ta Ningani (March 24) khan Assembly House Budget session-ah a pharh a, cheng vaibelchhe 14,008 zet niin kum hmasa aiin za zela 28.65% in a pung.

Mizoram Sports budget (Sports & Youth Services) erawh kum hmasa cheng nuai 2,573.34 aṭangin cheng 2,422.12-ah a tla thla. Chutihrualin kum 2021-22 chhunga budget hi an ennawn (revised) hnu khan cheng nuai 13,119.16 zetah a pung chho a ni.

USAM chuan, "Kum 2018-19 khan Sports Budget pumpui chu cheng nuai 5,077.21 a tling a, hemi hnu hian hniam chho zelin kum 2022-23 ah chuan Mizoram Budget pumpui (Rs 14,008 crore) aṭanga chhut a Sports Budget tura ruahman chu 0.17% chauh a tling.

"Ṭhalaite department-a kan ngaih ve Sports & Youth Services Department budget hi pung loa kumtin a hniam zawnga a kal chho hi sawrkarin ṭhalaite a ngaih pawimawh lohnaah kan ngai a, sports lamah nasa taka hma kan sawn chhoh mek laia budget hniam zawnga sorkarin min kalpui zel a nih chuan kan ṭhalaite hmakhua a thim hle dawn tihna a ni," tiin an lungawi lohna an tarlang.

United Sports Association of Mizoram (USAM) chuan Sports Budget hi a pung lo a nih chuan a pun theihna tur a nih chuan hmalak zel an inhuam thu an tarlang bawk.